Хууль зүй, дотоод хэргийн сайдад Жолоочийн хариуцлагын даатгалын хураамжийг нэмэгдүүлсэн гомдлыг иргэдээс ирүүлжээ. Тиймээс Санхүүгийн зохицуулах хорооноос ирүүлсэн материалыг хянаж үзээд Үндсэн хууль зөрчсөн байна гэж үзэн буцаажээ.

Энэ талаар Хууль зүй, дотоод хэргийн сайд О.Алтангэрэл мэдээлэл хийлээ.

Тэрээр "Жолоочийн даатгалын хураамжийг тооцох итгэлцүүр гэдэг аргачлалыг Санхүүгийн зохицуулах хорооноос батлуулахаар Хууль зүй, дотоод хэргийн яаманд арваннэгдүгээр сард ирүүлсэн. Ингэхдээ бүрдүүлэх ёстой материал дотор нөлөөллийн мэдүүлгийг бодит байдалтай нийцэхгүйгээр ирүүлсэн байна. Энэ итгэлцүүрээр жолоочийн хариуцлагын даатгалын хэмжээ эрс нэмэгдэж байна. 700 мянган төгрөг хүртэл нэмэгдэж байгааг иргэд шүүмжилж байгаа. Үндсэн хуульд заасан хүнийг гарал угсаа, нас хүйс, нийгмийн гарлаар нь ялгаварлан гадуурхахгүй гэсэн үндсэн зарчмыг зөрчсөн байна. Тодруулбал, 18-25 насны иргэд нэг өөр тарифаар, 61-ээс дээш насны иргэд өөр тарифаар даатгалд хамрагдахаар байна. Тиймээс нэгдүгээр сарын 9-ний өдөр буюу өчигдөр Санхүүгийн зохицуулах хорооноос ирүүлсэн материалыг хянаж үзээд, дахин бүрдүүл гэдэг шийдвэр гаргаж Санхүүгийн зохицуулах хороонд буцаалаа. Нэгдүгээр сарын 9-н хүртэл хураамж төлсөн хүмүүс мөнгөө эргэж нэхэмжлэх эрхтэй" гэсэн юм.