Хууль зүй дотоод хэргийн сайд О.Алтангэрэлээс цаг үеийн асуудлаар зарим зүйлийг тодрууллаа.

-Ачит Ихт компанийн захирал П.Цагааныг саатуулсан гэсэн мэдээлэл байна. Энэ үнэн үү?

-П.Цагаанийг эрүүгийн хэрэгт холбогдуулан шалгаж байгаа. Интерполын шугамаар олон улсад зарласантай холбоотойгоор гадаад улсад байгаа талаарх мэдээлэл манай улсад ирсэн. Одоогоор саатуулсан, хорьсон зүйл байхгүй.

Хэрвээ баривчлахаар бол заавал шүүхийн шийдвэр гарсан байх ёстой. Интерполоор зарлахдаа заавал прокурорын шийдвэрээр зарладаг.

-Хаана байгааг нь мэдэж байгаа юу?

-Сингапур улсад байна гэсэн мэдээлэл ирсэн. 5Ш ажиллагааны хүрээнд Монгол Улсад эрүүгийн хариуцлага хүлээх ёстой, зугтсан, гадаад улсад оргон зайлсан этгээдийг эрэн сурвалжилдаг. 2024 оны сүүлийн зургаан сарын байдлаар 10 гаруй этгээдийг Шувуу ажиллагааны хүрээнд авчирсан байна. Эрүүгийн хэрэгт шалгагдаж байгаа этгээдүүд гаднын улсад оргон зайлсан тохиолдолд Интерполын шугамаар олон улсад зарладаг. Хэнийг зарлах вэ гэдгийг прокурорын байгууллага шийддэг. Харин баривчлах, үгүйг шүүх шийддэг.

-П.Цагааныг ямар зүйл ангиар шалгаж байгаа юм бэ?

-Татвараас зайлсхийсэн, мөнгө угаасан гэсэн үндэслэлээр шалгаж байгаа гэсэн мэдээлэлтэй байгаа.

-УИХ-ын тухай хуулийн 41 дүгээр зүйлийн 41.9-д "УИХ-ын гишүүн бүрэн эрх дуусгавар болсноос хойш ажил эрхлээгүй бол 12 сарын хугацаанд гишүүний үндсэн цалинтай тэнцэх хэмжээний тэтгэмж, бага цалинтай ажилд орсон бол цалингийн зөрүүтэй тэнцэх хэмжээний тэтгэмж, гишүүнээр сонгогдохоосоо өмнө оршин сууж байсан газартаа шилжвэл өөрийнх нь болон гэр бүлийн гишүүний замын зардал, ачаа, тээшний хөлсийг авто тээврийн тарифаар тооцож олгоно" гэж заасан байна. УИХ-ын гишүүнд бусдаад давуу байдал бий болгосон энэхүү хуулийн заалтын талаар та ямар байр суурьтай байна вэ?

-УИХ-ын гишүүдийн эдлэх баталгаатай холбоотой зохицуулалт 1992 оноос хойш хэрэгжиж ирсэн. Нэг хэсэг хөдөө орон нутгаас сонгогдсон гишүүдэд орон сууц хүртэл өгч байсан юм билээ. Одоо бол энэ арга хэмжээ зохимжгүй гэдэг нь бүгдэд ил тод байгаа. Энэ удаагийн парламент баталчихсан хууль дээр орж ирсэн. Сонгуулиас хойш хуульд өөрчлөлт оруулаагүй. Тиймээс улс төрийн шийдвэр гаргаад хуулийн энэ заалтыг хүчингүй болгоход татгалзах гишүүн гарахгүй гэж бодож байна.

УИХ-ын гишүүн гэдгээрээ бусдаас давуу эрх эдлээд, цалин мөнгө нэмж аваад байх шаардлага байхгүй. УИХ-ын гишүүний үзэл бодлоо илэрхийлэх болон үйл ажиллагаа явуулахтай нь холбоотой хуулийн хөнгөлөлтүүд байдаг болохоос ахуй амьдрал, халаасанд зориулсан хууль байж болохгүй. Энэ хууль учраас хуулийг өөрчлөх боломжтой гэж бодож байна. Хэн нэг гишүүн санаачилбал би хамгийн түрүүнд гарын үсэг зураад дэмжээд явна.

-Энэ хуулийн хулгайн нэг хэлбэр мөн үү?

-1992 оноос хойш явсан энэ хуулийн зохицуулалтыг өөрчлөх ёстой. Хөдөө орон нутгаас сонгогдсон гээд орон байр, мөнгөний дэмжлэг авсан тохиолдол монголын найман удаагийн парламентын түүхэнд олон байгаа юм билээ. 126 гишүүнтэй парламент хувь гишүүнтэй холбоотой эрх ямба, тэр дундаа санхүүгийн эрх ямбанаас татгалзаж жишиг тогтоовол энэ цаашдаа уламжлагдаад явна.