УИХ-ын энэ 7 хоногийн хэлэлцэх асуудлын дараалалд Элчин сайдыг томилох асуудлаар зөвшилцөх тухай асуудлыг хэлэлцэнэ.
Монгол Улсаас Бүгд найрамдах Польш улсад суух Онц бөгөөд Бүрэн эрхт Элчин сайдаар Наваан-Юндэнгийн Оюундарийг томилуулахаар Ерөнхийлөгч У.Хүрэлсүх арванхоёрдугаар сарын 26-нд өргөн барьсан мэдүүлсэн байна.
Сануулахад, 2018 онд ЖДҮДС-аас одоогийн Ерөнхийлөгч У.Хүрэлсүхтэй ойр улстөрчид зээл авсан баримт ил болоход Н.Оюундарийн хүүгийн компани 950 сая төгрөгийн зээл авсан нь олон нийтэд ил болж байсан юм.
Н.Оюундарь Гадаад харилцааны дэд сайд, 2016-2024 онд УИХ-ын гишүүнээр ажиллаж байсан билээ. Тэрээр сүүлийн хоёр УИХ-ын сонгуулиар нэр дэвшихээр горилж байсан ч төвийн бүсэд мандат олдоогүй учраас нэр дэвшиж чадаагүй.
Тэрээр ажлын гараагаа Монголын үндэсний бүтээмжийн төвөөс 1995 онд эхэлж олон улсын төсөл хөтөлбөрт ажиллаж байгаад 2000 онд Байгаль орчны яамны Хамтын ажиллагааны хэлтсийн дарга болсон. 2004 онд НҮБ-ын “Биологийн төрөл зүйл”-ийн суурь конвенцийн дэд Ерөнхийлөгч, 2006 онд Швейцар улсын Женев хотноо НҮБ-ын Дундад Азийг хариуцсан зөвлөх зэрэг олон улсын байгууллагад ажилласан байна. 2008–2014 онд НИТХ-д МАН-аас нэр дэвшиж, сонгогдон Сүхбаатар дүүргийг төлөөлөн ажилласан. 2010 оноос “BlueMon” группийн үүсгэн байгууллагчдын нэг бөгөөд, группийн зөвлөхөөр ажилласан.
1997 оноос МАН-ын дэргэдэх НАМСЗХ-ы орон тооны бус нарийн бичгийн даргаар ажиллаж, эхэлснээс хойш МАСЗХ-ны удирдах зөвлөлийн гишүүн, МАХН (1994 оноос)-ны хорооны гишүүн, МАН-ын бага хурлын гишүүнээр сонгогдон ажиллаж байна.
