“Эдийн засгийн сэтгүүлч, шинжээчдийн клуб”-ын 2025 оны анхны өглөөний уулзалт Хөгжлийн банкны алс хэтийн төлөвлөгөөг сонссоноор эхэллээ. Банкны өнөөгийн нөхцөл байдал үндсэндээ нэг байрандаа гацсан байгааг Гүйцэтгэх захирал З.Нарантуяа танилцуулсан юм.
МУУ НУУХААР САЙН ИЛЧИЛ...
2022 оны эхэнд биднийг Хөгжлийн банкны чанаргүй зээлдэгчдийн нэрстэй анх танилцахад л хамгийн чанга, эвгүй гэгдэж байсан "хэцүү нэрт"-үүд өнөөх Хөтөл, Бэрэн, Эрэл тэргүүтэй зээлдэгчид одоо ч зээлээ эргүүлэн төлөөгүй байгаа нь банкны урагш алхах боломжийг хумьсан хэвээр байна. Хэдийгээр сүүлийн хоёр жил гаруйн хугацаанд зээлийг эргүүлэн төлүүлэх бүхий л талын арга хэмжээг шат шатны байгууллагатай хамтран авч, гадаад бондын эргэн төлөлтөө хийж чадсан ч одоо хамгийн хүнд, эргүүлэн төлүүлэх чадамжгүй зээлүүд нь шигшигдээд үлджээ. Одоогоор эргүүлэн төлүүлэх шаардлагатай 700 гаруй тэрбум төгрөгийн зээл байгаа аж. Энэ нэгдүгээр том асуудал.
Ээлжит хүндрэл нь банкны гол үзүүлэлт болох актив хөрөнгийн хэмжээ 8 жилийн өмнөхтэй харьцуулахад 60 хувиар буурчээ. Тодруулбал, 2017 онд 5.8 их наяд төгрөг байсан актив хөрөнгө нь 2024 оны 12 сарын 31-ний байдлаар 2.3 их наяд төгрөг болсон байна. Чанаргүй зээлдэгчдийн мэдээллийг ил тод зарласнаас хойш банк зөвхөн зээлийг эргүүлэн төлүүлэхэд л гол хүчээ дайчилсаар ирсэн тул зээл олгох, төсөл санхүүжүүлэх, эх үүсвэр татан төвлөрүүлэх үндсэн үйл ажиллагаагаа хэрэгжүүлэхгүй зогсонги байдалд ороод царцжээ.
Монгол Улсад Хөгжлийн банк байх хэрэгтэй юу гэвэл мэдээж тийм. Гол нь зөв төслүүдээ олж, онож санхүүжилт олгодог, тэр нь арилжааны банкны олгочих чадамжтай “Муур нохойны хоол үйлдвэрлэл”, “Тайван зогсоол” төдийхөн аар, саархан төсөл биш байх шаардлагатай.
Манай улсад мега төслийн хөрөнгө оруулалт шиг нэн хэрэгтэй зүйл алга. Засгийн газраас танилцуулснаар “Шинэ сэргэлтийн бодлого”-ын хүрээнд 14 мега төсөл, 149 хөтөлбөр хэрэгжүүлэхээр зорьж буй. Үүнээс экспортын өрсөлдөх чадварыг дэмжих төслүүдэд Хөгжлийн банк хөрөнгө оруулахаар төлөвлөсөн гэдгээ танилцуулав. Өмнөх алдаагаа дахин давтахгүй байхын тулд эдийн засгийн үр ашгийг тодорхойлох судалгааны баг ажиллуулахаар бүтцийн шинэчлэл хийж байгаа юм байна. Тэгээд тухайн төсөл нь аль нам гарснаас шалтгаалаад гацаад зогсчихдог биш үр дүнгээ өгтлөө хэрэгждэг байхад л гол анхаарлаа хандуулдаг байхаар зорьж буйгаа банкны удирдлагууд танилцууллаа. Энэ нь ЭКСИМ банк болох чиглэл рүү л тэмүүлж буй зорилт гэнэ.
Цаашид мэдээж хөгжлийн өөр загварчлал, бүтцийн шинэ шийдэл хэрэгтэй.
Ойрын хугацаанд Хөгжлийн банк муу зээлүүдээсээ салах нь хийх шаардлагатай эхний ажил болоод байна. Чанаргүй зээлүүдээ 4 хувааж төлүүлэхээр менежментийн арга хэмжээ авч ажиллаж байгаа юм байна. Үүний зэрэгцээ хуулийн шинэчлэлийн ажлыг эрчимжүүлнэ. Дараагийн ээлжид ногоон хөгжлийг дэмжсэн, ногоон зээл олгоход төвлөрнө. Энэ оны эцэс гэхэд 2 их наяд төгрөгийн төсөл хөтөлбөрийг санхүүжүүлэхээр төлөвлөжээ. Зээл олгох салбарын хувьд сэргээгдэх эрчим хүч, хөдөө аж ахуй, байгаль орчин, уул уурхай, тээвэр, логистик, боловсруулах үйлдвэрлэлд чиглэсэн зээл олгохоор зорьж байна гэв.
Хөгжлийн банкны Гүйцэтгэх захирал З.Нарантуяа: Хөгжлийн банкны дүрмийн сангаа 700 тэрбум төгрөгөөр нэмэгдүүлнэ
Тус банк одоо танилцуулж буй шинэ стратегийн дагуу ажилласнаар 2023 оны байдлаар ДНБ-д 3.5 хувийг эзэлж байгаа банкны активын эзлэх дундаж хувь хэмжээ 2030 онд 12.8 хувь болж өсөх буюу 4.8 тэрбум ам.доллароос 11.9 тэрбум ам.доллар болж өснө гэсэн тооцооллыг гаргаад байна.
