УИХ-ын гишүүн Д.Цогтбаатарыг Хөгжлийн банкны хэргээр ял шийтгэсэн анхан шатны шүүхийн шийдвэрийг Дээд шүүх хэвээр үлдээсэн. Ингэснээр УИХ-ын гишүүн Д.Цогтбаатарын бүрэн эрхийн асуудал хөндөгдөж байгаа бөгөөд шүүхийн шийдвэр албажиж ирсний дараа УИХ шийдвэрээ гаргаж, УИХ-ын гишүүн Д.Цогтбаатарын бүрэн эрхийг түдгэлзүүлэх нөхцөл байдал үүсээд байгаа. Нэгэнт Дээд шүүхийн шийдвэр гарсан учраас хуульд зааснаар Д.Цогтбаатар гишүүний бүрэн эрхийг түдгэлзүүлэх учиртай. Тиймээс хангайн бүс буюу УИХ-ын сонгуулийн нэгдүгээр тойрогт нөхөн сонгууль явуулах нөхцөл үүснэ. УИХ-ын гишүүн Д.Цогтбаатар нь 2024 оны УИХ-ын сонгуулиар Хангай бүс буюу нэгдүгээр тойрогт АН-аас нэр дэвшиж УИХ-ын гишүүнээр сонгогдсон. Тэрээр 55,935 сонгогчийн санал авч анх удаа УИХ-ын гишүүнээр сонгогдон ажиллаж байна. Гэхдээ шүүх түүнийг гэм буруутайд тооцсон учраас Үндсэн хууль, УИХ-ын тухай хуульд зааснаар УИХ-ын гишүүний бүрэн эрх дуусгавар болж сонгогдсон тойрогт нь УИХ-ын нөхөн сонгууль явуулах юм. Хуульд зааснаар УИХ-д нөхөн сонгууль явуулах нөхцөл үүсвэл 50 хоногийн дотор нөхөн сонгуулийг товлон зарладаг. Нөхөн сонгуулийн зардлыг Засгийн газрын нөөц хөрөнгөөс гаргах хуулийн зохицуулалттай юм байна.
