Монгол Улсын эрчим хүчний хэрэглээний 60-иас илүү хувийг Улаанбаатар хотын эрчим хүчний хэрэглээ эзэлдэг. Улаанбаатар хотын эрчим хүчний хэрэглээ жилээс жилд өсөн нэмэгдэж байгаа нь эрчим хүчний хэрэглээний дутагдалд хүргэсээр 2023 оны өвөл Улаанбаатар хот цахилгаан хязгаарлалтад үе үе өртөх болсон. Тиймээс Улаанбаатар хотын зүгээс дотоодын зах зээлд 500 тэрбум төгрөгийн бонд арилжаалж, бондын 300 тэрбумыг Бөөрөлжүүтийн цахилгаан станцын төсөлд хөрөнгө оруулж, бүтээн байгуулалтыг эрчимжүүлсэн.
2024 оны аравдугаар сард уг станцын эхний блок 150 МВт хүчин чадалтай цахилгаан станцыг ашиглалтад оруулж, арванхоёрдугаар сарын сүүлээс үе шаттайгаар цахилгаан эрчим хүчийг Төвийн бүсийн нэгдсэн системд нийлүүлж эхлээд байна. Энэ сарын 6-наас Бөөрөлжүүтийн станц 150 МВт эрчим хүчийг бүрэн хүчин чадлаараа нийлүүлж хэвшинэ. Бөөрөлжүүтийн цахилгаан станцын эхний блок 150 МВт хүчин чадалтай станц, Багануурын 50 МВт хүчин чадалтай батарей хуримтлуурын станц 2024 онд ашиглалтад орж, эрчим хүчийг нэгдсэн системд нийлүүлж байгаа учир Улаанбаатарт дахин эрчим хүчний дутагдлаас үүдсэн цахилгааны хязгаарлалт хийгдэхгүй болж байна.
2024 онд баригдсан эдгээр шинэ станц нь Монгол Улсын тэр дундаа Улаанбаатар хотын эрчим хүчний системд 200 МВт эх үүсвэрийг шинээр нэмэгдүүлэхээс гадна орчин үеийн дэвшилтэт технологи, эрчим хүчний хэмнэлттэй ногоон эх үүсвэрийг Монгол Улсын эрчим хүчний системд нэвтрүүлж байгаа онцлогтой. Бөөрөлжүүтийн цахилгаан станц нь нам температурын шаталттай учраас хорт утааны хаягдал Монгол Улс дахь стандартаас 3 дахин бага. Салхин хөргүүртэй учраас усны хэрэглээ харьцангуй бага, станцаас ялгарах тоосжилт бага. Мөн Бөөрөлжүүтийн хүрэн нүүрсний ордыг түшиглэн байгуулагдсан учраас нүүрс татахдаа эдийн засгийн үр өгөөжтэй гээд маш хэмнэлттэй, тооцоо, судалгаатайгаар баригдсан юм.
Багануурын батарей хуримтлуурын станцын хувьд ч эрчим хүчний хэрэглээ бага шөнийн цагаар өөрийгөө цэнэглэж, эрчим хүчний хэрэглээ өндөр оройн цагаарцахилгаан эрчим хүчийг нийлүүлдэг онцлогтой. Ингэснээр тус станц нүүрс хүчлийн хий ялгаруулдаггүй, цэвэр ногоон технологи буюу сэргээгдэх эрчим хүчний эх үүсвэртэй болжээ.
