Засгийн газрын ээлжит бус хуралдаан болж найман асуудал хэлэлцсэн. Хэлэлцсэн шийдвэрлэсэн асуудлын талаар холбогдох сайд нар мэдээлэл хийлээ. Хэвлэлийн хуралд Шадар сайд С.Амарсайхан, Аж үйлдвэр, эрдэс баялгийн сайд Ц.Туваан, Уур амьсгалын өөрчлөлт, байгаль орчны сайд С.Одонтуяа нар оролцлоо.

Аж үйлдвэр, эрдэс баялгийн сайд Ц.Туваан: Засгийн газрын хэрэгжүүлэхээр зарласан 14 мега төслөөс гурав нь хэрэгжих шатандаа явж байна.

1. Эрдэнэбүрэнгийн усан цахилгаан станцын санхүүжилтийн гэрээ шийдвэрлэгдсэн.

2.Гашуунсухайт-Ганцмодны хил холболтын төмөр замын хэлэлцээрт орох асуудлыг УИХ чиглэл болгож өгсөн.

3.Францын Засгийн газартай хэрэгжүүлэх ураны Хөрөнгө оруулалтын гэрээг хэлэлцэж байна.

Зэс хайлуулах үйлдвэр байгуулах асуудлыг Засгийн газрын хуралдаанаар оруулсан.  Тендерийн шатандаа ороод явж байна. Мөн хийн хоолойн асуудал өндөр түвшинд яригдаж байгаа. Ирэх жил гурван улсын түвшинд энэ асуудлыг хэлэлцэнэ. Түүнчлэн говийг усжуулах ажил яригдаад явж байна.

Тавантолгойн цахилгаан станцын асуудлыг гацаанаас гаргана. Энэ станцыг барьснаар Оюутолгойн уурхайг эрчим хүчээр хангах боломжтой болно. Дээрх төслүүд маш шуурхай явж байна.

Гашуунсухайт-Ганцмодны хил холболтын төмөр зам барьж байгуулах гэрээг намрын чуулганаар ёсчлон батлуулахаар ажиллаж байгааг онцоллоо.