Засгийн газрын ээлжит бус хуралдаан болж найман асуудал хэлэлцсэн. Хэлэлцсэн шийдвэрлэсэн асуудлын талаар холбогдох сайд нар мэдээлэл хийлээ. Хэвлэлийн хуралд Шадар сайд С.Амарсайхан, Аж үйлдвэр, эрдэс баялгийн сайд Ц.Туваан Уур амьсгалын өөрчлөлт, байгаль орчны сайд С.Одонтуяа нар оролцлоо. Нийслэлийн агаарын бохирдлын талаар хэлэлцсэн талаар Шадар сайд С.Амарсайхан, Уур амьсгалын өөрчлөлт, байгаль орчин сайд С.Одонтуяа нар мэдээлэл хийлээ.

Шадар сайд С.Амарсайхан: 2500 гаруй нийслэлийн албан хаагч агаарын чанар, сайжруулсан түлшний чанар стандартыг хангах, түүхий нүүрсний хэрэглээнд хяналт тавьж байна. Тавантолгой түлш компанийн түлшинд гаднын лабораториудад шинжилгээ хийлгэж байна. Тодруулбал, БНСУ, Япон, БНХАУ-д бүтээгдэхүүний дээжийг явуулж шинжлүүлж байгаа. Ойрын хугацаанд хариу гарна.

Уур амьсгалын өөрчлөлт, байгаль орчны сайд С.Одонтуяа: Агаарын бохирдлыг бууруулах үндэсний хороо энэ сарын 25-нд хуралдсан. Энэ хуралдаанаар ойрын хугацаанд хийх ажлаа хэлэлцэж, холбогдох сайд нарт үүрэг даалгавар өгсөн. Өнөөдрийн хуралдаанаар үүрэг даалгаврын биелэлтийг танилцуулсан.

Агаарын бохирдлыг бууруулах асуудал дээр зарчмын шинэчлэл хийхээр зорьж байгаа. Тооноос илүү чанарын шинэчлэл хийхээр Засгийн газрын хуралдаанд танилцууллаа. Түүхий нүүрс түлдэг 40 гаруй ахуйн нэгжийн асуудлыг яаралтай шийдэх үүргийг өнөөдөр өглөө.

Мөн агаарын бохирдлын 20 гаруй хувийг үүсгэж байгаа автомашины асуудлыг шийдэх үүргийг Аж үйлдвэр, эрдэс баялгийн яаманд өгсөн. Евро 5 стандартын түлш рүү шилжих, татварын ямар бодлого баримтлах вэ гэдэг чиглэлээр шат дараатай арга хэмжээ авахаар болсон.