ХӨСҮТ-өөс томуу, томуу төст өвчний талаарх мэдээлэл хийлээ. Хэвлэлийн хуралд ХӨСҮТ-ийн дэд захирал О.Батбаяр, ЭХЭМҮТ-ийн Хүүхдийн эрчимт эмчилгээний тасгийн эрхлэгч Р.Батсолонго нар оролцлоо.
Өмнөх долоо хоногийн мэдээллээр нийт эмнэлэгт хэвтэн эмчлүүлж буй хүмүүсийн 38 орчим хувь нь амьсгалын замын хүнд халдвар буюу уушгины үрэвсэлтэй хүмүүс байна. Томуу, томуу төст өвчний 75 орчим хувь нь 15 хүртэлх насны хүүхдүүд эзэлж байгаа бөгөөд үүнээс 5 хүртэлх насны хүүхдүүд 40 орчим хувийг эзэлж байсан гэж өнгөрсөн долоо хоногт мэдээлж байсан юм. Тэгвэл энэ 7 хоногийн мэдээлэлд томуугийн өвчлөл 30-35 хувийг эзэлж байгааг албаныхан хэллээ.
ХӨСҮТ-ийн Дэд захирал О.Батбаяр: Томуугийн вирусийн эзлэх хувь өмнөх сарын дунд үед нэг хувь байсан бол одоогийн байдлаар 30-35 хувийг эзлээд байна. Томуу, томуу төст өвчний гол эрсдэл бол уг өвчний вирус нь ковид-19-ийн вирустэй адил бөгөөд богино хугацаанд хүндрэх аюултай байдаг. Үүнээс болж богино хугацаанд хатгаа болох, өндөр халуурах, булчин болон үе мөчөөр өвдөх эрсдэлтэй.
ЭХЭМҮТ-ийн Хүүхдийн эрчимт эмчилгээний тасгийн эрхлэгч Р.Батсолонго: Томуу, томуу төст өвчин нь маш олон хүндрэлүүдтэй. Энэхүү өвчнөөр суурь өвчин эмгэгтэй хүмүүс өвдөж хүндрэх эрсдэлтэй байна. Энэ жил 10-14 насны хүүхдүүд маш хурдан хугацаанд уушгины хатгалгаа болж байна.
Томуугийн өвчний хүндрэх шинж тэмдэг нь халуунтай хэдий ч хөл гар нь хөрдөг. Үүнийг цагаан халууралт гэж нэрлэдэг. Мөн хоолны дуршилгүй болж унтаж чадахгүй шинж тэмдэг илэрвэл өвчин хүндэрсэн гэсэн үг. Ийм тохиолдолд эмчид үзүүлж, эмнэлэгт хурдан хэвтэн эмчлүүлэх шаардлагатай.
Томуу, томуу төст өвчин нь цочмог, өндөр халууралттай, богино хугацаанд хүүхдийн биеийн байдлыг хүндрүүлдэг. Эцэг эхчүүд эмчийн зөвлөсөн зөвлөгөөг дагаж, бичиж өгсөн эмийг зааврын дагуу хүүхдэдээ хэрэглүүлэх үүрэгтэй. Ямар ч тохиолдолд эцэг эхчүүд дур мэдэн хүүхдэдээ эмчилгээ хийж болохгүй.
Тиймээс эцэг эхчүүд халдварын сэргийлэлт хийж маскаа зүүх, өөрийн болон хүүхдийнхээ эрүүл мэндэд анхаарч амаа зайлах, гараа тогтмол угаах, халуун бүлээн шингэн зүйл сайн уух нь чухал юм.
