Гашуунсухайт-Ганцмод хил дамнасан холболтын төмөр замын бүтээн байгуулалттай холбогдох УИХ-ын тогтоолын төслийг Засгийн газрын хуралдаанд танилцуулж, УИХ-д өргөн барихаар шийдвэрлэсэн байна.

Аж үйлдвэр, эрдэс баялгийн сайд Ж.Туваан: Монгол Улсын Засгийн газар, БНХАУ-ын Засгийн газар хооронд Гашуунсухайт-Ганцмод боомтын хил дамнасан төмөр замын бүтээн байгуулалтыг хэрэгжүүлэх хэлэлцээрийг байгуулахад баримтлах үндсэн чиглэл батлах тухай" гэсэн тогтоолын төслийг өргөн барьж байгаа.

Хоёр улсын хил дамнасан төмөр замын боомтуудын бүтээн байгуулалтын ажил нэлээд хугацаа алдаж, сунжирсан байдаг. Анх 2003 оноос яригдаж, 2009 онд хил дамнасан төмөр замын бүтээн байгуулалтыг хийх хэлэлцээр хийсэн. Олон жил гацсан төмөр замд холбогдсоноор нүүрсний экспорт 40 сая тонноор нэмэгдэнэ. Гашуунсухайт-Ганцмод боомтын холболтын дараагаар олон боомт ашиглалтад орж, нээгдэнэ.

Өнгөрсөн хугацаанд 4-5 тэрбум ам.долларын эдийн засгийн боломжийг алдсан. Энэ асуудлыг шийдэхийн тулд УИХ-аас чиглэл авах тогтоолын төсөл санаачилж өргөн барьж байна. Тогтоол батлагдсаны дараа хоёр улсын хоорондох хэлэлцээр рүүгээ орно.

Хэлэлцээр хэлэлцэгдсэний дараа УИХ-аар соёрхон батална. Энэ хооронд хоёр улсаас Ажлын хэсэг байгуулагдаад ажиллаж байгаа. Монголын талын Ажлын хэсгийг би ахалж байгаа. Ажлын хэсэг 60 орчим удаа хуралдсан. Өнөөдөр ч үргэлжлээд явж байгаа. Мөн үүний дараа хоёр төрийн өмчит компани буюу "Эрдэнэс Таван толгой", "Чайна энержи" компани хоорондоо гурвалсан гэрээ байгуулснаар үйл ажиллагаа эхлэх юм гэв.