Монгол, Францын хамтарсан “Бадрах Энержи” ХХК-ийн хөрөнгө оруулагч Орано майнинг компанитай байгуулах Хөрөнгө оруулалтын гэрээний төслийг тохирох яриа хэлэлцээний явцын талаар мэдээллийг өнөөдөр Засгийн газрын хуралдаанд танилцуулсан байна. Засгийн газрын хуралдааны шийдвэрийг ЗГХЭГ-ын дарга Н.Учрал танилцуулсан бөгөөд ураны Хөрөнгө оруулалтын гэрээний төслийг УИХ-д өргөн мэдүүлэх юм.

ЗГХЭГ-ын дарга Н.Учрал: Цөмийн энергийн хуулийг хэлэлцэж байх үеэс ураны үнэ дэлхийн зах зээл дээр өссөн. Манай улс ураныг газрын доор уусган олборлох байгаль орчинд үзүүлэх нөлөөлөл, зардал багатай технологийг ашиглана. Төслийн хувьд геополитикийн хувьд өндөр ач холбогдолтой. Гуравдагч хөрштэй хийж байгаа хоёр дахь том Хөрөнгө оруулалтын гэрээ юм.

Уран бол өдөр ирэх тусам үнэ нь өсөж байгаа стратегийн бүтээгдэхүүн, цаашлаад Парисын хэлэлцээрээр хүлэмжийг хийг бууруулах хүлээсэн үүргээ биелүүлэх, цөмийн эрчим хүчийг ашиглах, атомын цахилгаан станцтай болох гээд олон зүйлүүдийн суурь болох Хөрөнгө оруулалтын гэрээ юм. Анх Францын Орона компани Монголд төлөөлөгчийн газраа нээснээс хойш 27 жил төсөл бодитой урагшилж, УИХ-д орж ирж байгаагүй. Харин энэ Засгийн газар эргэлтэд оруулж байна.

Энэ төслийг эхлүүлснээр улсын төсөвт 29 сая ам.доллар, ирээдүйн өв санд 36 сая ам.доллар, хуримтлалын санд 593 сая ам.доллар байхаар 51 хувийг өгөөж тохируулах нэмэлт төлбөр байна. Үндсэн хуулийг хангуулаагүй, тухайн жилийн орлого нь 51 хувьдаа хүрээгүй бол хөрөнгө оруулагч талаас 51 хувийг нэмэгдүүлэхтэй холбоотой тохируулга хийдэг. Энэ заалтыг Хөрөнгө оруулалтын гэрээнд тусгаж өгснөөр жилд заавал 51 хувийг хангуулна.