Засгийн газрын ээлжит хуралдаан болж 42 асуудал хэлэлцжээ. Тухайлбал,
Монгол, Францын хамтарсан “Бадрах Энержи” ХХК-ийн хөрөнгө оруулагч "Орано майнинг" компанитай байгуулах Хөрөнгө оруулалтын гэрээний төслийг тохирох яриа хэлэлцээний явцын талаар,
Гашуунсухайт-Ганцмод хил дамнасан холболтын төмөр замын төслийн явцын талаар, Стратегийн ач холбогдол бүхий ашигт малтмалын ордын төрийн эзэмшлийн хувь, хэмжээг тогтоох тухай” Улсын Их Хурлын тогтоолын төсөл,
“2025 оныг Нийслэлийн хөгжлийг дэмжих жил болгон зарлах тухай” Засгийн газрын тогтоолын төсөл, Гашуунсухайт-Ганцмод хил дамнасан холболтын төмөр замын бүтээн байгуулалттай холбогдох УИХ-ын тогтоолын төсөл зэрэг асуудлуудыг хэлэлцэж байна. Хуралдаанаас гаргасан шийдвэрийн талаар холбогдох сайд нар мэдээлэл хийлээ.
Нийслэлийн Засаг дарга Х.Нямбаатар “2025 оныг Нийслэлийн хөгжлийг дэмжих жил болгон зарлах тухай” Засгийн газрын тогтоолын төслийн талаар мэдээлэл өглөө. Тус тогтоолоор ААНОАТ-ын нэг хувийг нийслэл хотын утаа, түгжрэлийг бууруулахад зарцуулахаар болсон байна. Нийслэл Улаанбаатар хотод хүн амын 50 хувь нь амьдарч байна. Нийслэлийн төлөвлөгөөгөөр 600 мянган хүн амьдарч, 84 мянган машин зорчих төлөвлөлтийг 1976 онд баталсан байдаг аж. Үүнээс хойш ерөнхий төлөвлөгөөг хэд хэдэн удаа шинэчилжээ. Ирэх 7 хоногийн Засгийн газрын хуралдаанд Улаанбаатар хотыг 2040 он хүртэл хөгжүүлэх төлөвлөгөөг танилцуулах юм байна.
Нийслэлийн Засаг дарга Х.Нямбаатар "Ирэх жил Засгийн газар Улаанбаатар хотын дэд бүтцийн хөгжлийг дэмжих зорилт тавьж, тогтоол баталлаа. Улаанбаатар хотыг 2040 он хүртэл хөгжүүлэх төлөвлөгөөний хүрээнд дэд бүтэц, дулаан хангамжийн эх үүсвэр бүрдүүлэх, ус хангамжийн эх үүсвэр, авто замын хоёр түвшний бүтээн байгуулалтуудыг барьж байгуулах, агаарын бохирдлыг бууруулах зорилт дэвшүүлсэн. Өнөөдөр Улаанбаатар хотын агаарын бохирдлыг бууруулах богино, дунд хугацааны төлөвлөгөөг танилцуулж батлуулна. Энэ төлөвлөгөөний хэрэгжилтийг хангах дээр Засгийн газар бүх талын дэмжлэг, туслалцаа үзүүлнэ. Аж ахуйн нэгжийн орлогын албан татварын нэг хувийг нийгмийн хариуцлагын хүрээнд захиран зарцуулах шийдвэр гаргасан. Үүнтэй уялдуулж таван сайдын хамтарсан тушаалаар ААНОАТ-ын нэг хувийг нийслэлийн дэд бүтцийг шийдэхэд зарцуулах журмыг баталлаа. ААНОАТ-ын нэг хувийн санхүүжилтээр нийслэлийн дэд бүтцийн хөгжлийг шийдвэрлэнэ гэсэн үг. Ирэх жил Улаанбаатар хотын агаар, хөрс усны бохирдлыг бууруулах, түгжрэлийг бууруулах хэд хэдэн том төсөл хөтөлбөр хэрэгжүүлнэ. Үүнд:
Айл өрхүүдийн түлшийг өөрчилж, давхар шатлалт зуухыг тараана. Улаанбаатар хотын агаарын бохирдлын 56 хувийг гэр хорооллын айл өрх, 30 орчим хувийг 500-600 мянган тээврийн хэрэгслийн азотын давхар исэл үүсгэж байна. Агаарын бохирдол үүсгэж байгаа хүчин зүйл бүр дээр нэг жилийн хугацаанд авах богино хугацааны төлөвлөгөөг гаргасан.
Нийтийн тээврийн үйлчилгээнд явж байгаа автобуснуудыг хийн болон цахилгаан хөдөлгүүр рүү шилжүүлнэ.
Агаарын бохирдол үүсгэж байгаа тээврийн хэрэгслүүдийг хөдөлгөөнд оролцуулахгүй байх
170 уурын зуухнаас жил бүхэн 30 хувийг нь хийн дулааны станц руу шилжүүлэх
Эдгээр төлөвлөгөөг дээр хэлсэн ААНОАТ-ын нэг хувийн эх үүсвэрээр шийднэ. Бусад эх үүсвэрийг нийслэл дотоод боломж Орон нутгийн хөгжлийн сан, нийслэлийн төсвөөр бүрдүүлнэ. Мөн чиг үүрэг, чиглэлийн яамд нийслэлийн түгжрэл, агаарын бохирдлыг бууруулахад ирэх нэг жилийн хугацаанд анхаарал тавьж ажиллана” гэлээ.
