“Монгол Улсын нийслэл Улаанбаатар хотын Дулааны гуравдугаар цахилгаан станцын өргөтгөл, шинэчлэлийн төслийн зураг төсөл боловсруулах тухай Монгол Улсын Засгийн газар, Оросын Холбооны Улсын Засгийн газар хоорондын хэлэлцээр”-ийг соёрхон батлах тухай хуулийн төслийг УИХ-ын Эдийн засгийн байнгын хорооны хуралдаанаар хэлэлцэж байна.
Хуралдааны үеэр гишүүд асуулт асууж, хариул авч байна. Энэ үеэр гишүүд асуулт асууж, хариулт авлаа.
Өндөр дүнгээр ОХУ-аас зээлээр авах станцын тоног төхөөрөмж орчин үеийнх байж чадах уу
УИХ-ын гишүүн Ж.Алдаржавхлан: Нэгдүгээрт, энэ 1.5 тэрбум еврогийн өртөгтэй төсөл байна. Үндсэндээ 85 нь ОХУ-ын зээл юм байна. Үүнийгээ Эгийн голын УЦС-тайгаа уяж болоогүй юу. Илүү өндөр өртөгтэй станцыг барих гэж байгаа бол Эгийн голын цахилгаан станцтай холбож явуулж болохгүй юу. Хоёрдугаарт, зээлийн хэлэлцээрийг уншихад бүх тоног төхөөрөмжөө ОХУ-аас авна гэсэн байна. Одоо ОХУ-д ийм хэмжээний орчин үеийн технологи байгаа юу.
Эрчим хүчний сайд Б.Чойжилсүрэн: Энэ төслийг ОХУ-аас 1 тэрбум 326 сая еврогоор барья гэсэн санал 2022 оны есдүгээр сард манайд ирүүлсэн. Бид зөрүүлээд ийм өндөр үнээр авч, бариулж чадахгүй гэдэг санал тавьсан. Харин ОХУ ажлын зураг төслөө хийчхээд үнийг нь тохиръё гэдэг санал тавьж байгаа. Бидний хувьд 814 сая доллароос илүү өртгөөр бариулж чадахгүй гээд хоёр талаасаа тулчхаад байж байна. Тийм учраас Эгийн голын усан цахилгаан станцтай ямар нэгэн байдлаар холбохгүй байгаа. Шахаа авахгүй гэж бодож байна. Энэ удаа зөвхөн зураг төсвийг боловсруулъя. Үүний дараа үнэ тохирвол барилга угсралтын ажил, гэрээ байгуулах тухай ярина. Тохирохгүй бол гэрээ байгуулагдахгүй.
