Гэр бүл, хөдөлмөр нийгмийн хамгааллын сайд Л.Энх-Амгалан Ажиллах хүчний шилжилт хөдөлгөөний тухай хуульд нэмэлт, өөрчлөлт оруулах тухай хуулийн төслийг энэ сарын 20-нд өргөн барьсан. Тус хуулийн төслийг энэ 7 хоногт УИХ хэлэлцэх, эсэхийг нь хэлэлцэхээр хэлэлцэх асуудлын дараалалд оруулаад байгаа. Нийгэмд хуулийн төсөлтэй холбоотой маргаан үүсээд байгаа учраас хууль санаачлагч Гэр бүл, хөдөлмөр нийгмийн хамгааллын сайд Л.Энх-Амгалан хуулийн төсөлд оруулж байгаа өөрчлөлтийн талаар өнөөдөр мэдээлэл өгсөн юм.

Хамтарсан Засгийн газраас өргөн барьсан хуулийн төсөлд Засгийн газрын бүх гишүүн дэмжиж санал өгдөг. Гэхдээ хамтран Засаг барьж байгаа АН-ын бүлэг хуулийн төслийг дэмжихгүй гэсэн шийдвэр гаргасан учраас маргаашийн Засгийн газрын хурлаар хуулийн төслөө дахин хэлэлцүүлэхээр болсон байна. Түүнчлэн хуулийн төслийг боловсруулахдаа Монгол Улсын хөдөлмөрийн зах зээлийн эрэлт нийлүүлэлтийн таамаглалын судалгааг хийлгүүлжээ. Энэ судалгаагаар ирэх 15 жилд буюу 2035 он хүртэл Монгол Улс хөдөлмөрийн хүчний хомстолд орно гэсэн дүн гарчээ. 15 жилийн хугацаанд ажиллах хүчний хомстол 240 орчим мянгад хүрч магадгүй гэсэн дүн гарсан байна. Хэрвээ 14 мега төсөл бүгд хэрэгжээд, эдийн засаг 6-7 хувьтай өсвөл ажиллах хүчний ийм хэмжээний хомстол үүсэхээр байгаа талаар Л.Энх-Амгалан сайд мэдээлсэн юм. Мөн тэрээр энэ хуулийн төслийг Монголын ардчилсан холбооныхон санаатайгаар гуйвуулж байгаа. Засгийн газраас өргөн хуулийн төслийг санаатайгаар гуйвуулж байгаа, үндэсний язгуур эрх ашгийг эрхэмлэх, бодит мэдээллийг үндэслэх, үндэсний эв нэгдлийг эрхэмлэх зарчим байх ёстой. Ард иргэдийг турхирч, өдөөн хатгаж байгаа улстөрчид хуулийн хариуцлага хүлээх ёстой гэсэн юм.

Тэрээр "Засгийн газраас өргөн барьсан хуультай холбоотой өчигдөр жагсаал цуглаан зохион байгуулсан. Өнөөдөр бид жагсаал хийсэн иргэдийн төлөөлтэй уулзахаар цаг тохирсон ч нэг ч хүн орж ирсэнгүй. Энэ хүмүүс Монголын ардчилсан холбооны байран дээр байгаа гэж бодож байна. Энэ жагсаал цуглааныг Монголын ардчилсан холбооноос зохион байгуулж байгаа. Х.Баттулга, Б.Мөнхбаясгалан гишүүд Монголын ардчилсан холбоонд харьяалагддаг. Тиймээс энэ хүмүүс ирээд миний тайлбарыг сонссон бол сайн байсан юм.