Нийслэлийн агаарын чанарын мэдээллийг  хэрхэн хэмждэг талаар Ус, цаг уур, шинжилгээний газраас мэдээлэл өглөө.

ЦУОШГ-ын Ахлах мэргэжилтэн Д.Өнөрбат: Агаарын чанарын арванхоёрдугаар сарын 9-15 өдрийн индексийг өнгөрсөн оны мөн үетэй харьцуулахад:

-Хүхэрлэг хийн агууламж стандартаас 52 хувиар давсан байсан бол энэ онд 85 хувь,

-Азотын давхар исэл стандартаас 38 хувиар давж байсан бол 2024 онд 71 хувь,

-PM10 тоосонцор стандартаас 26 хувиар давж байсан бол энэ онд 67 хувь,

 -PM2.5 тоосонцор стандартаас 46 хувиар их байсан бол 2024 онд 81 хувь болж тус тус өссөн байна.

Нийслэлийн хэмжээнд агаарын чанарын индексийг хэмждэг 19 станц байдаг аж. Эдгээр 19 цэгт хүхэрлэг хийн үзүүлэлт байнга давсан үзүүлэлттэй гарч байгаа. Хамгийн өндөр агууламжтай цэгүүд Нэгдүгээр хороолол, Толгойт, Баянхошуу байна. Энэ сарын 13-18-ны өдрүүдийн хамгийн оргилдоо хүрсэн цэг нь Баянхошуу орчимд арванхоёрдугаар сарын 16-ны өдөр 506 мкг/м3 хүрчээ. Стандарт хэмжээ нь 50 байдаг бол 10.1 дахин өссөн үзүүлэлт юм.

Азотын давхар ислийн хувьд эдгээр өдрүүдэд 8-150 мкг/м3 хяналт шинжилгээний агууламжтай байна. Хамгийн өндөр агууламжтай бохирдолтой цэгүүд нь Нэгдүгээр хороолол, 100 айл, Толгойт гэсэн цэгүүд байна. Мөн арванхоёрдугаар сарын 16-ны өдөр хамгийн өндөр агууламжтай байж, стандарт хэмжээнээс 3.1 дахин их гэсэн үзүүлэлттэй гарчээ.  Түүнчлэн, PM10 тоосонцрын хувьд хамгийн өндөр агууламжтай цэгүүд Нэгдүгээр хороолол, Хайлааст, Шархад гэсэн хэсгүүдэд 4.3 дахин их байжээ.

PM2.5 тоосонцрын хувьд хамгийн өндөр агууламжтай цэг нь Нэгдүгээр хороолол, Хайлааст, Баянхошуу зэрэг газрууд байна. Нэгдүгээр хороолол хэсэгт стандарт хэмжээ нь 50  мкг/м3 567 буюу стандарт хэмжээнээс 11.3 дахин өндөр агууламжтай байв.

Агаарын чанарыг MNS 4585-2016 гэсэн стандартын дагуу хэмждэг байна. Агаарын чанарын индексийг agaar.mn сайтаар дамжуулан олон нийтэд гурван цагийн зайтай мэдээлдэг ажээ.  Агаарын чанарын индекс нь agaar.mn сайт дээр 30 минут тутам шинэчлэгддэг байна. Агаарын чанарыг

-MNS 4585:2016 Агаарын чанар техникийн ерөнхий шаардлага,

-MNS 5885:2008 Агаарт байх бохирдуулах бодисын хүлцэх хэм  хэмжээ, техникийн ерөнхий шаардлага

-MNS 6063-2010 Агаарын чанар-Хот суурин газрын гадаад орчны агаарт байх бохирдуулах бодисын хүлцэх хэм хэмжээ гэсэн гурван стандартын дагуу хэмждэг юм байна.

Монгол Улсад хүхэрлэг хийг 20 минут, 24 цаг, нэг жил гэсэн стандартаар хэмждэг байна. Агаарын чанарыг хэмжихэд хугацаа чухал байдаг гэдгийг албаныхан онцлов. Тоос тоосонцрыг 24 цаг хэмжиж байж индексийг нь нарийвчлан гаргах боломжтой аж.