УИХ-аар 2024 оны эхээр хэлэлцээд буцаасан Хөрөнгө оруулалтын тухай хуулийн шинэчилсэн найруулгын төслийг "Гадаадын хөрөнгө оруулалтын тухай хууль" нэртэйгээр дахин өргөн барихаар бэлтгэж байна. Шадар сайд Т.Доржхандын Ажлын албанаас уг хуулийн төслийг бизнес эрхлэгч, хөрөнгө оруулагчдад танилцуулах, санал авах арга хэмжээг үе шаттай зохион байгуулж байгаа аж. Монгол Улс Хөрөнгө оруулалтын тухай хуулийг 2013 онд баталснаас хойш нийтдээ 15 удаа нэмэлт, өөрчлөлт оруулсан бол өдгөө шинэчилсэн найруулга байдлаар өргөн барьж хэлэлцүүлэхээр зэхэж байна.
Монгол Улсад 30 орчим жил тасралтгүй үйл ажиллагаа явуулж байгаа, гадаадын хөрөнгө оруулалтыг анхлан нэвтрүүлэгчдийн нэг Мобиком корпорацийн ХХК-ийн гүйцэтгэх захирал, Төлөөлөн удирдах зөвлөлийн гишүүн Кожи Курушимагаас гадаадын хөрөнгө оруулалтын ач холбогдлын талаар зарим зүйлийг тодрууллаа.
-Одоогоос 28 жилийн өмнө Монголын Ньюком групп, Японы Сүмитомо, KDDI группын хөрөнгө оруулалтаар Мобиком корпораци ХХК-ийг үүсгэн байгуулж, Монголын анхны үүрэн холбооны үйлчилгээг эхлүүлж байсан. Мобиком бол гадаадын хөрөнгө оруулалтын жишиг болохуйц баялаг түүхтэй том компани. Та гадаадын хөрөнгө оруулалтын ач холбогдлыг хэрхэн хардаг вэ. Компанийнхаа жишээн дээр дэлгэрэнгүй танилцуулбал?
-Мобиком компани 28 дахь жилдээ гадаадын хөрөнгө оруулалт татаж, амжилттай ажиллаж байна. Манай компани зах зээлд үйл ажиллагаа явуулж эхэлсэн 1996 онд Монголд үүрэн холбооны компани байгаагүй, технологийн туршлага бага байсан. Энэ нь зах зээлээ олоход давуу тал болсон. Гэхдээ Монголд нэвтрүүлсэн үйлчилгээ гаднын улс орнуудад аль хэдийнэ нэвтэрсэн байсан. Гаднын хөрөнгө оруулалтын давуу тал нь технологи дээр хамгийн түрүүнд мэдрэгдсэн болов уу. Мобикомын үйл ажиллагааг дагаад дэлхийн шинэ технологи, үүрэн холбооны бүтээгдэхүүний талаар мэдлэг, туршлага Монголд нэвтэрсэн гэж хардаг.
