Нийслэлийн Засаг дарга Х.Нямбаатар Улаанбаатар хотын угаарын бохирдол, утааны асуудлаар ямар арга хэмжээ авч хэрэгжүүлж ажиллах талаараа Төрийн ордонд мэдээлэл хийж байна. Тэрээр нийслэлийн хэмжээнд хэрэгжүүлэхээр төлөвлөж байгаа том төслүүдийн талаар мэдээлэл өгч, урт хугацаанд том төслүүдээ хэрэгжүүлэх замаар ужигарсан утаа, түгжрэлийг асуудлыг шийднэ гэдгийг онцлов. Улаанбаатар хотод сүүлийн 30 жил эрчим хүчний шинэ эх үүсвэр баригдаагүй. Хот дотооддоо гаргасан бондын эх үүсвэрээр Бөөрөлжүүтийн цахилгаан станцын эхний ээлж, батарей станцыг ашиглалтад оруулсан. Энэ ондоо багтаад төвийн эрчим хүчний системд холбогдоно гэлээ. Мөн гэр хорооллыг үе шаттай орон сууцжуулахаас гадна дунд хугацаандаа газын хэрэглээнд шилжих ажлыг эхлүүлнэ, одоо ашиглаж байгаа сайжруулсан шахмал түлшний орц найрлагыг өөрчлөх судалгааны ажлыг эхлүүлснийг онцоллоо.
Мөн энэ үеэр Улаанбаатар хотод барих метроны төслийн санхүүжилтийг гаднаас босгосон гэж тэрээр мэдэгдлээ.
Нийслэлийн Засаг дарга Х.Нямбаатар: Метротой холбоотой санхүүжилтийн асуудлыг шийдсэн гэж хэлж болно. Энэ долоо хоногт Их Британийн Засгийн газрын Сангийн яамнаас Монголын Засгийн газарт UKS буюу Их Британийн Засгийн газрын газраас 3 тэрбум фунт стерлингтэй тэнцэх баталгааг 15 жилийн хугацаатай гаргаж, метроны төслийг санхүүжүүлэхээр болж байна.
Миний бие очиж уулзаж, нэлээд дэлгэрэнгүй яриа хэлэлцээр хийсэн. Энэ бол бидний одоо зарласан байгаа метроны тендерээ зогсоож, хойшлуулахгүйгээр явуулах боломж бүрдэж байна. Бид урт хугацааны санхүүгийн сайн хэрэгслийг ашиглаж, мертоны төслөө урагшлуулах боломжтой. Ирэх оны нэг, хоёрдугаар сард синдикат банкуудтай хэлэлцээр хийхээр төлөвлөж байгаа. Би гадаад томилолт авах төвөгтэй байна. Гадаад явлаа гэж шүүмжлүүлээд байгаа учраас синдикат банкуудтай онлайн уулзалт болон Улаанбаатарт урих талаар ярилцаж байна. Энэ асуудал дээр гаднын зөвлөхүүд аваад ажиллаж байна гэлээ.
