Үндэсний статистикийн хорооноос Монгол Улсын нийгэм, эдийн засгийн 2024 оны эхний арваннэгдүгээр сарын үзүүлэлтийг өнөөдөр /2024.12.17/ танилцууллаа.
Хэрэглээний үнийн мэдээлэл:
Хэрэглээний бараа үйлчилгээний үнэ буюу инфляц 2024 оны арваннэгдүгээр сард улсын хэмжээнд өмнөх оны мөн үеэс 8.1 хувь, өмнөх сараас 1.7 хувиар өссөн байна. Улаанбаатар хотод инфляц 2024 оны арваннэгдүгээр сард өмнөх сараас 1.7 хувь өмнөх оны мөн үеэс 7.9 хувиар өссөн бол аймгуудын хувьд 5.3-аас 15.2 хувиар тус тус өссөн байна.
Инфляц 2024 оны арваннэгдүгээр сард улсын хэмжээнд 8.1 хувь гарсны 2.1 нэгж хувь нь хүнсний барааны үнийн өсөлтөөс, 2.1 нэгж хувь нь орон сууц, цахилгааны үнийн өсөлтөөс шалтгаалсан байна. Импортын барааны үнэ өмнөх оны мөн үеэс дунджаар 28 хувиар өссөн нь инфляцад 2.3 нэгж хувийн нөлөө үзүүлсэн байна.
Экспорт 781.7 саяар, импорт 2.2 тэрбум ам.доллароор өсжээ
Монгол Улс 2024 оны арваннэгдүгээр сарын байдлаар нийт 158 улстай гадаад худалдаа хийж, гадаад худалдааны нийт бараа эргэлт 25.2 тэрбум ам.долларт хүрсэн байна. Экспорт 14.6 тэрбум ам.доллар импорт 10.6 тэрбум ам.долларт хүрч, гадаад худалдааны тэнцэл 4 тэрбум ам долларын ашигтай гарсан байна. Гэхдээ энэ өмнөх оны мөн үеэс 1.4 тэрбум ам доллараар буурсан үзүүлэлт аж.
Нийт экспорт өмнөх оны мөн үеэс 781.7 сая ам доллар, импорт 2.2 тэрбум ам.доллараар тус тус өссөн байна. БНХАУ-тай 2024 оны эхний арваннэгдүгээр сард 17.6 тэрбум ам.долларын худалдаа хийжээ. Энэ нь гадаад худалдааны нийт бараа эргэлтийн 70 хувийг эзэлж байна.
2024 оны эхний арваннэгдүгээр сард экспорт 93.1 хувийг уул уурхай, 4.9 хувийг хөдөө аж ахуйн гаралтай бараа бүтээгдэхүүн бүрдүүлж байна. Экспортын 91.3 хувийг БНХАУ, 4.7 хувийг Швейцар улс руу хийсэн нь нийт экспортын 96 хувийг бүрдүүлж байна. Экспорт 781.7 сая ам доллароор өсөхөд зэсийн хүдэр баяжмалын экспорт 528 сая ам. доллар, алт 181 сая ам доллар, төмрийн хүдэр баяжмал 153.3 сая ам доллар, нүүрс 126.3 сая ам доллароор тус тус өссөн нь голлох нөлөөллийг үзүүлжээ.
Мөнгөний нийлүүлэлтийн мэдээлэл:
Мөнгөний нийлүүлэлт 2024 оны арваннэгдүгээр сарын эцэст урьдчилсан гүйцэтгэлээр 41.5 их наяд төгрөг болж өмнөх оны мөн үеэс 6.1 их наяд төгрөг буюу 17.2 хувиар өссөн байна. Энэхүү өсөлтөд төгрөгийн хадгаламж 5.2 их наяд төгрөг буюу 32.5 хувь, төгрөгийн харилцах 2.6 их наяд төгрөгөөр өссөн нь голлон нөлөөлсөн байна.
