УИХ Улс төрийн намын тухай хууль /Шинэчилсэн найруулга/-ийг дагаж мөрдөх журмын тухай хуульд өөрчлөлт оруулах тухай хуулийн төслийг хэлэлцэн баталсан. Хамтран Засаг барьж байгаа АН-ын бүлэг дээрх хуулийн өөрчлөлтийг дэмжихгүй гэсэн улс төрийн шийдвэр гаргасан ч хууль батлагдлаа.

Тус өөрчлөлтөөр намууд дүрэм, журмаа шинэчлэн Улсын дээд шүүхэд бүртгүүлэх хугацааг ирэх оны арванхоёрдугаар сарын 31 болгон хойшлуулав. Уг нь энэ ондоо багтаад улс төрийн намууд дүрмээ шинэчлэн баталж, Улсын дээд шүүхэд хүртгүүлэх хуулийн хугацаатай байсан ч энэ хугацааг хойшлуулж өгөх санал гаргасан хэмээн хууль санаачлагчид тайлбарласан. Намууд Их хурлаараа дүрмээ хэлэлцэн баталдаг учраас энэ жил Их хурлаа хийж амжихгүй гэж үзжээ. Гэхдээ Их хурлаа хийх нь зарим намын дарга нарт ашиггүй байгаа учраас энэ хугацааг хойшлуулсан гэсэн мэдээлэл ч улс төрийн хүрээнд гарсан. Учир нь Их хурлаараа дүрмээс гадна намын даргын асуудлыг хэлэлцдэг. Тиймээс Их хурлаа хуралдуулвал даргаас чөлөөлөгдөх нөхцөл бүрдэх учраас Улсын дээд шүүхэд шинэ дүрмээ батлуулах хугацааг хойшлуулж байгааг ч үгүйсгэхгүй.

Намууд дүрмээ шинэчлэн бүртгүүлэх хугацааг хойшлуулсан ч Улс төрийн намын тухай хуулийн нэг гол заалт болох нийт сонгогчдын нэг хувийн саналыг авсан намуудад төрөөс санхүүжилт олгох заалт хэрэгжинэ. УИХ-ын сонгуулийн дүнгээр долоон нам төрөөс 7.4 тэрбум төгрөгийн дэмжлэг авахаар байгаа. Тодруулбал, парламентад суудалтай МАН, АН, ХҮН нам, Үндэсний эвсэл, Иргэний зориг ногоон нам авахаас гадна УИХ-д суудал аваагүй ч нийт сонгогчдын нэгээс дээш хувийн буюу 40-69 мянган сонгогчийн санал авсан Шинэ нэгдсэн эвсэл, Үнэн ба зөв нам төсвөөс санхүүжилт авах хуулийн эрх нээгдсэн талаар СЕХ-оос зарласан. Ирэх жилээс МАН төрөөс 2.8 тэрбум төгрөг, АН 2.1 тэрбум төгрөг, ХҮН нам 993 сая төгрөг, Үндэсний эвсэл 446 сая төгрөг, Иргэний зориг ногоон нам 455 сая төгрөг, Шинэ нэгдсэн эвсэл 312 сая төгрөг, Үнэн ба зөв нам 250 сая төгрөг гээд нийт 7.4 тэрбум төгрөгийн санхүүжилт авна.

Намууд үүргээ биелүүлж, хуульд нийцүүлэн дүрмээ шинэчлэн бүртгүүлэх хугацаагаа хойшлуулсан ч санхүүжилт авах хугацаагаа хэвээр үлдээв.