Монгол Улс Евразийн эдийн засгийн холбоотой чөлөөт худалдааны хэлэлцээр байгуулах тухай асуудал нэлээд маргаан дагуулж байгаа билээ. Уг асуудлыг дотоодын бизнес эрхлэгчид хүчтэй эсэргүүцэж, Эдийн засаг хөгжлийн яам, Хүнс хөдөө аж ахуй хөнгөн үйлдвэрийн яам болон УИХ-ын холбогдох байнгын хороонд уг хэлэлцээрийг хойшлуулах, цаашлаад цуцлах хүртэл арга хэмжээ авч өгөхийг шаардсан албан бичгийг хүргүүлээд буй.

Тэгвэл ирэх пүрэв гаригт УИХ-ын Эдийн засгийн байнгын хорооны хуралдаанаар Монгол Улс болон Евразийн эдийн засгийн холбоо хоорондын хамтын ажиллагаа, чөлөөт худалдааны гэрээний талаарх Монгол Улсын Тэргүүн шадар сайд бөгөөд Эдийн засаг, хөгжлийн сайдын мэдээллийг сонсохоор болсон байна.

Түүнчлэн, арванхоёрдугаар сарын 26-27-ны өдрүүдэд Монгол Улсын Шадар сайд, Орос-Монголын Засгийн газрын комиссын дарга С.Амарсайхан Москвад айлчлах үеэр Ервазийн эзийн засгийн холбооны чөлөөт худалдааны хэлэлцээрт Монгол Улс нэгдэх асуудлыг эцэслэх хүлээлттэй байгаа юм.