"Дархан цаазат Богдхан уулаа нүхлэхийн тулд өр тавьж, 1.4 тэрбум ам.доллар үрэх нь зөв үү? Дараа нь ямар мөнгөөрөө Богдхан уулынхаа өвөрт хот байгуулах вэ" гэдэг асуудлаар Монгол Улсын гавьяат эдийн засагч Б.Осоргарав тэргүүтэй хүмүүс өнөөдөр /2024.12.16/ мэдээлэл хийлээ.

Эдийн засагч Б.Осоргарав: 1.4 тэрбум ам долларын өр тавьж дархан цаазат Богдхан уулаа нүхлэхийг эсэргүүцэж байна. Богдхан уулаа нүхэлчхээд дараа нь дахиад хаанахын хэдэн тэрбум ам.доллароор хот байгуулах вэ. Ингэж сэтгэл хөдлөлөөр 20 минутын концепцод хандах нь буруу юм.

Дархан цаазат Богдхан уулыг нүхэлж зам тавих асуудлаар УИХ дээр сонсгол хэлэлцүүлэг явуулах ч юм уу эсвэл бүх ард түмнээрээ хэлэлцүүлж санал авах хэрэгтэй. Хамтарсан Засгийн газар байгуулсан дээрээ тулга тойрсон асуудалд биш харин улс орныхоо хөгжлийг тэлсэн мега төслүүдийг хийж хэрэгжүүлэхийг уриалж байна.

Дархан цаазат Богд уулаа нүхлэх тэр их өр зээлийнхээ мөнгөөр шинэ Хархорум хот руугаа хурдны галт тэрэгний зам тавиад түгжээт Улаанбаатар хотынхоо нэг хэсгийг тийш нь нүүлгэж болно. Энэ нь Богдхан уулаа нүхлэхээс хэдэн арав дахин ирээдүйд үр ашигтай хувилбар юм.