Монгол Улсын Шадар сайд Т.Доржхандын хариуцсан яам Төрийн худалдан авах ажиллагааны тухай хуулийн төсөл болон Гадаадын хөрөнгө оруулалтын тухай хуулийн төслийг боловсруулж байгаа аж. Гадаадын хөрөнгө оруулалтын тухай хуулийн төсөлд хөрөнгө оруулалт татах, хөрөнгө оруулагчийн эрх ашгийг хамгаалах чиглэлд ямар заалтууд орж байгааг Шадар сайдын орон тооны зөвлөх Г.Жавхлантөгсөөс тодрууллаа.
-Та өмнө нь Америкийн худалдааны танхимд ажиллаж байсны хувьд хөрөнгө оруулагчдын жаргал, зовлонг хамгийн сайн мэдэж байгаа. Гадаадын хөрөнгө оруулалтын тухай хуулийн төсөл УИХ-ын босго давж чадахгүй, нэг бус удаа буцсан. Одоо боловсруулж байгаа хуулийн төсөлд ямар гол заалтууд орж байна вэ?
-Концепцын хувьд хуулийн нэр Гадаадын хөрөнгө оруулалтын тухай хууль гэж өөрчлөгдөж байгаа. Өөр нэг чухал заалт бол Гадаадын хөрөнгө оруулалтын зөвлөл байгуулахаар оруулж байна. Хөрөнгө оруулалтын хувь хэмжээ, босго, Тогтворжуулалтын гэрээ, Хөрөнгө оруулалтын гэрээтэй холбоотой асуудлыг бодлогын судалгаатай холбоотой асуудал маргааныг энэ зөвлөл хянан хэлэлцдэг байна.
Гадаадын хөрөнгө оруулагчдад тавих босгыг эдийн засгийн салбараас нь хамааран ялгаатай байхаар ярьж байна. Эдийн засгийн салбар бүрд хөрөнгө оруулалтын хэмжээ харилцан адилгүй учраас бүхэлд нэг босго тавьж болохгүй. Маргаан шийдвэрлэхтэй холбоотой асуудал байнга яригддаг. Тиймээс ямар маргааныг хэрхэн шийдвэрлэх вэ гэдгийг Хөрөнгө оруулалтын зөвлөл шийддэг болно. Хөрөнгө оруулагчид маргаантай асуудлаараа уг зөвлөлд хандвал эвлэрүүлэн зуучлах байдлаар ажиллаж, тухайн маргааныг хэлэлцээний замаар шийдвэрлэдэг байхаар хуулийн төсөлд оруулж байна. Хэрвээ зөвлөл зургаан сарын дотор тухайн маргааныг шийдвэрлэж чадахгүй бол тухайн хөрөнгө оруулагч үндэсний арбитр эсвэл гадаадын арбитрт хандах уу гэдэг сонголтоо хийж болно. Гэхдээ тухайн үүссэн асуудлыг арбитр рүү явуулж цаг хугацаа алдахаас сэргийлж, хэлэлцээний замаар шийдвэрлэх болохыг эрэлхийлж Хөрөнгө оруулалтын зөвлөл байгуулж байгаа юм. Иймэрхүү сэтгэлгээ болон соёлын өөрчлөлт хийхэд энэ хуулийн төсөл чухал үүрэг гүйцэтгэнэ гэж харж байна.
