“Neue Zürcher Zeitung”-т нийтлэгдсэн  “Mongolia looks to West for help in breaking out of its superpower neighbors' shadow” гарчигтай нийтлэлийг орчуулан хүргэж байна.

Монголын нийслэл Улаанбаатарт хүйтний эрч чангарч, агаарын температур тэгээс доош бууж, монголчууд нүүрсээ түлж,  нүүрсний  үнэр хамар цоргино.

Тус улсад нүүрс нь халаалтын үндсэн түлш хэвээр байна. Монголчууд гэр хэмээх уламжлалт сууцанд нүүрсээ энгийн зууханд түлж амьдардаг. Тус улсын ихэнх цахилгаан станцууд мөн нүүрсээр ажилладаг бөгөөд дэд бүтэц нь хоцрогдсон, утаа их хэмжээгээр ялгаруулдаг. Монгол Улс байгаль орчноо илүү сайн хамгаалж, эрчим хүчний хангамжаа бие даан хэрэгжүүлэх боломжийг олгох эрчим хүчний тогтвортой систем рүү шилжихийг хүсэж байна. Гэсэн хэдий ч энэ зорилгын замд ОХУ-ын Ерөнхийлөгч Владимир Путин саад болж байна. Монгол Улс ОХУ-ын нутаг дэвсгэрт орших Байгаль нуурын цутгал Сэлэнгэ мөрөн дээр усан цахилгаан станц барихаар эртнээс төлөвлөж байсан. Гэвч Москва далан нь нуурын экологийн нарийн тэнцвэрт байдлыг алдагдуулна гэж үзэж байгаа бөгөөд Кремль Монголыг төслөө зогсоохыг шаардсан. Энэ хооронд Орос Байгаль нуурын өөр нэг цутгал болох Ангар мөрөн дээр өөрийн усан цахилгаан станцын төслүүдээ урагшлуулж байна.