УИХ-ын чуулганы нэгдсэн хуралдаанаар Монгол Улсын 2025 оны төсвийн тухай, Нийгмийн даатгалын сангийн 2025 оны төсвийн тухай хуульд өөрчлөлт оруулах тухай, Эрүүл мэндийн даатгалын сангийн 2025 оны төсвийн тухай хуульд өөрчлөлт оруулах тухай хуулийн төслүүдийн эцсийн хэлэлцүүлгийг хийн баталлаа.

Тус хуулийн төслүүдийг Засгийн газар энэ сарын 4-нд өргөн мэдүүлсэн юм. Ерөнхийлөгч 2025 оны төсвийн тухай хуульд бүхэлд нь хориг тавьсантай холбоотойгоор Засгийн газар түүхэндээ анх удаа нэг жилийн төсвийг хоёр удаа өргөн барьж, батлууллаа. Анх баталсан төсөв алдагдал ихтэй, үр ашиггүй зардал өндөр байгааг бууруулахаар Ерөнхийлөгч хориг тавьсан. Тиймээс Засгийн газар 2025 оны төсвийн хуулийн дахин өргөн барихдаа Монгол Улсын Ерөнхийлөгчийн тавьсан хоригт нийцүүлж, алдагдалгүй төсөв өргөн барих бодлого барьсан. Энэ хүрээнд төсвийн зардлыг 2.3 их наяд төгрөгөөр, орлогыг 393 тэрбум төгрөгөөр бууруулахаар төсөлд тусгасан. Төсвийн орлогыг 33 их наяд төгрөгөөр тооцсон юм.

Нийт засагдах зардлыг задалж харвал, урсгал зардлаас 800 тэрбум, хөрөнгийн зардлаас 800 тэрбум, гадаад зээлийн ашиглалтын зардлаас 700 тэрбум төгрөгийг тус тус танахаар тооцсон байна.

Урсгал зардлаас 800 тэрбум төгрөгийн хэмнэлт хийхийн тулд нэг удаа хойшлуулж болох дараах зардлыг бууруулахаар төлөвлөсөн байна. Энэ нь бүх төсвийн ерөнхийлөн захирагч хамаатай.

Тавилга авах зардлыг 100 хувь

Багаж, техник хэрэгсэл, бичиг хэргийн зардлыг 50 хувь

Дотоод, гадаад томилолтын зардал 50 хувь /Өндөр түвшний айлчлал, өндөр түлшний зочин төлөөлөгч хүлээн авахаас бусад/

Тээвэр шатахууны зардал 50 хувь /ЭМ, Тусгай чиг үүргийн байгууллагаас бусад/

Хичээл үйлдвэрлэлийн дадлагын зардлыг 50 хувь бууруулан баталсан. /ЭМС, БС, ХЗДХС, БХС-аас бусад/

Мөн УИХ-ын төсвийн ажлын хэсэг Засгийн газраас өргөн барьсан төсвийн төсөл дээр ажиллаад 80 тэрбум төгрөгийн тэвчиж болох зардлаас хасаж шаардлагатай салбар руу шилжүүлсэн юм.