Монгол Улсын Засгийн газар Ервазийн эдийн засгийн холбоотой чөлөөт худалдааны хэлэлцээр байгуулахаар ажиллаж байгаа билээ. Уг хэлэлцээрийг байгуулснаар Монгол Улс Ервазийн эдийн засгийн холбооны гишүүн орон болох ОХУ, Беларусь, Казахстан, Армени, Киргизстан улстай 375 нэр төрлийн бараа харилцан татваргүй, квотгүй экспортолж, импортлох боломжтой болно гэж Эдийн засаг, хөгжлийн яамнаас мэдээлсэн.
Харин үйлдвэр эрхлэгчид энэхүү хэлэлцээрийг яаран байгуулах шаардлагагүй, хойшлуулж, зогсоох шаардлагатайг удаа дараа мэдэгдээд байна. Учир нь, дээрх таван улсаас харилцан татваргүй оруулж ирэх бараа бүтээгдэхүүн нь дотоодын үйлдвэрлэлийн хэвийн үйл ажиллагааг алдагдуулж, олон үйлдвэр хаалгаа барихад хүрэх эрсдэлтэйг анхааруулж байна.
Иймд мэргэжлийн холбоод /Хүнсний хувьсал ТББ, Монголын хүнсчдийн нэгдсэн холбоо, Монголын мал зүйч, үржүүлэгчдийн үндэсний холбоо, Монголын тариаланчдын холбоо/-ын зүгээс Евразийн эдийн засгийн холбоотой байгуулах гэж буй чөлөөт худалдааны түр гэрээг хойшлуулах, цаашлаад зогсоох тухай шаардлагыг Үндэсний аюулгүй байдлын зөвлөл, Засгийн газар, Эдийн засаг хөгжлийн яам, Гадаад харилцааны яам, Хүнс хөдөө аж ахуйн яам, УИХ-ын холбогдох байнгын хороонд хүргүүлжээ.
