Засгийн газрын дахин өргөн барьсан төсвийн хуулийн хоёр дахь хэлэлцүүлгийг УИХ-ын Төсвийн байнгын хороо хийж дууссантай холбоотойгоор УИХ-ын Төсвийн ажлын хэсэг мэдээлэл хийлээ. Хэвлэлийн хуралд ажлын хэсгийн ахлагч, УИХ-ын гишүүн Г.Тэмүүлэн болон ажлын хэсгийн гишүүд оролцож, мэдээлэл өглөө. Ажлын хэсэг дээр нэмэгдүүлэхээр оруулж ирсэн 3145 орон тоог 1248-г хасаж 40 тэрбум төгрөгийн хэмнэлт хийжээ. Мөн Дөрөвдүгээр эмнэлгийн барилгыг худалдаж авахад 25 тэрбум төгрөг тусгасан байна.

УИХ-ын Төсвийн ажлын хэсгийн ахлагч Г.Тэмүүлэн: Засгийн газар 2025 оны төсвийн төслийг дахин боловсруулахдаа урсгал зардлыг өмнөхөөсөө 2.3 их наяд төгрөгөөр бууруулж алдагдалгүй төсөв өргөн барьсан сайн талтай. УИХ-аас байгуулагдсан ажлын хэсэг 2025 оны төсөв дээр үр ашиггүй зардлуудыг танаж, ирээдүйд үүсч болох эрсдлийг хязгаарлах, төсвийн тэлэлтийг хумих зэрэг бодлого барьж ажиллалаа.

Монгол Улсын хэмжээнд эдийн засаг дахь төрийн оролцоо нэмэгдэж, төрийн албан хаагчийн тоо 230 мянгад хүрсэн бол бусдаар гүйцэтгүүлэх ажил 70 орчим хувиар нэмэгдэж байгаа асуудал дээр  төсвийн сахилга батыг сайжруулах, төсөв дээр ирэх ачааллыг бууруулж, ард иргэдийн амьжиргаа орлогыг дэмжсэн төсөв болон мөнгөний бодлогыг уялдуулах чиглэлээр ажиллалаа.

Засгийн газраас төрийн албан хаагчийн тоог 3000-аар нэмэх санал оруулж ирснийг 12 байгууллага дээр  зарим дээр нь 100 хувь хязгаарлаж, зарим байгууллага дээр 50 хувь нэмэгдүүлэх,  ачаалал ихтэй ажилладаг байгууллага дээр орон тоог нэмэх зохицуулалт хийлээ. Ирэх жилүүдэд төрийн албан хаагчийн тоог нэмэх бус цомхон чадварлаг төрийн албан хаагчтай болох ёстой гэдгийг тогтоолоор орууллаа.