“МИАТ” ТӨХК Бүгд Найрамдах Социалист Вьетнам улсын Хо Ши Мин хот руу анхны хуваарьт нислэгээ амжилттай үйлдэж, Улаанбаатар–Хо Ши Мин нислэгийн нээлт боллоо.

Нээлтийн үйл ажиллагаанд ЗТЯ-ны Төрийн нарийн бичгийн дарга С.Батболд, БНСВУ-аас Монгол улсад суугаа Онц бөгөөд Бүрэн Эрхт Элчин сайд Нгуен Дуан Тань болон албаны бусад хүмүүс оролцож, анхны нислэгийн зочдоо үдэн гаргалаа.

Энэхүү хуваарьт нислэг үйлдэж эхэлснээр Монгол Улс, Вьетнам улс хоорондын худалдаа, эдийн засаг, тээвэр ложистик, аялал жуулчлалын салбарын хамтын ажиллагаа өргөжихөд үнэтэй хувь нэмэр оруулж, цаашид хоёр орны зорчигч урсгал нэмэгдэх чухал ач холбогдолтой гэдгийг хоёр талын төлөөлөгчид онцлон тэмдэглэв.

“МИАТ” ТӨХК-ийн энэхүү нислэг нь долоо хоногийн мягмар, баасан гарагуудад тогтмол үйлдэгдэх бөгөөд өнөөдрийн нээлтийн нислэгээ нийт 292 зорчигчтойгоор үйлдлээ.

 Энэ жил Монгол Улсад аялал жуулчлалын салбар үүсэж хөгжсөний 70 жилийн ой тохиож байна. Монгол Улсын Засгийн газраас зарласан Монголд зочлох жилийн хүрээнд сүүлийн жилүүдэд манай улсыг зорин ирэх жуулчдын тоо улам бүр нэмэгдсээр байгаа. Тэр хэрээр агаарын тээврээр зорчигчдын тоо ч хурдацтай өсөж байна.

Иймд Зүүн өмнөд Азид төдийгүй дэлхийд эдийн засаг, аж үйлдвэрлэл, аялал жуулчлалаараа тэргүүлж буй Хо Ши Мин хотын нислэг тогтворжсоноор цаашид зорчигч тээвэр болон ачаа эргэлт улам бүр ихсэх төлөвтэй байгаа юм.

Эх сурвалж: Зам тээврийн яам