УИХ-ын нэгдсэн чуулганы хуралдаанаар Монгол Улсын нэгдсэн төсвийн 2025 оны төсвийн хүрээний мэдэгдэл, 2026-2027 оны төсвийн төсөөллийн тухай хуульд өөрчлөлт оруулах тухай хуулийн төслийн хэлэлцүүлгийг хийлээ. Хэлэлцүүлгийн үеэр гишүүд асуулт асууж, хариулт авлаа.

УИХ-ын гишүүн Э.Батшугар: Нэгд, төсвийн зарцуулалт, үр ашиг, хүртээмжийн талаар эргэж харах нь зүйтэй гэж бодож байна. Ялангуяа урсгал зардал 24 их наяд төгрөг үүнээс эрүүл мэнд, боловсрол, тэтгэвэр, хүүхдийн мөнгө, батлан хамгаалах салбарын төсвөөс хасвал 11,8 их наяд төгрөг болж байна. Энэ нь нийт дотоодын бүтээгдэхүүний 12,4 хувь байна. Гэтэл бидний харьцуулалт хийдэг Казахстан улсын нийт төсөв нь дотоодын нийт бүтээгдэхүүнийхээ 15,6 хувь байдаг. Үндсэндээ бид урсгал зардалдаа дэндүү их мөнгө үрээд байна. Үүнтэй холбоотойгоор хөрөнгө оруулалт  нэмэгдэхгүй байна. Манай улсын төсвийн хөрөнгө оруулалт нийт төсвийн ердөө 9 хувь байна. Гэтэл хөгжиж буй орнуудад улсын төсвийнхөө 20 хувийг хөрөнгө оруулалт, бүтээн байгуулалтдаа зарцуулдаг.

Хоёрт, том зургаараа харахад төрийн алба, Засгийн газар болон бусад салбарын үр дүн сайн байх ёстой. Энэ асуудалд засгийн газар яаж анхаарч байна, хэрхэн төрийн албаны бүтээмжийг сайжруулах вэ.

Гуравт, Хөгжлийн банк гэх том институци бий. Хөгжлийн банкны чанаргүй зээлийг тодорхой хэмжээнд бүтцийн өөрчлөлт хийж үүгээр дамжуулж хөрөнгө оруулагчдыг татах боломж байна. Ингэснээр манай улсын мега төслүүдийг санхүүжүүлэх мөн бусад хөгжлийн түүчээ болох томоохон төслүүдийг хэрэгжүүлэх бүрэн бололцоотой.