Австралийн уул уурхайн аварга Рио Тинто (RIO.AX) ирэх онд Монгол дахь Оюу толгойн олборлолт 50 хувиар өсөх төлөв болон бусад уурхайн олборлолт нэмэгдэхтэй холбоотойгоор 2025 оны санхүүгийн жилийн зэсийн орлого өснө гэж үзэж байна. Рио Тинтогийн ашиг нь голчлон төмрийн хүдрээс бүрддэг ч Оюу толгойн уурхай төдийгүй Чили дэх “Codelco” болон “First Quantum”-тай хамтран ажиллаж байгаа төслүүдээр дамжуулан зэсийн салбарт ирэх жилүүдэд анхаарч эхлээд буй.
Тус компани 2030 он гэхэд жилийн зэсийн олборлолтоо нэг сая тоннд хүргэхээр зорьж байгаа бөгөөд эрчим хүчийг хувиргахад зайлшгүй шаардлагатай өндөр чанартай, түүхий эд болох зэсэнд анхаарлаа хандуулж, цэвэр эрчим хүчний хангамжийн сүлжээнд томоохон тоглогч болох зорилготой.
Гүйцэтгэх захирал Якоб Стаушолм "Бид дэлхийн эрчим хүчний шилжилтэд нэн шаардлагатай материалын эрэлт хэрэгцээ улам өснө гэдэгт итгэж илүү хүчирхэг, илүү төрөлжсөн, өсөн нэмэгдэж буй бизнесийг бий болгох стратегиа хэрэгжүүлж байна" хэмээжээ.
Харин Рио Тинто 2025 оны төсөвтөө нийт хөрөнгийн зардлыг 2024 онд 9.5 тэрбум ам.доллар гэж төсөөлж байснаас 11.0 тэрбум доллароор нэмэгдүүлэхээр төлөвлөж байгаа аж. Аравдугаар сард Рио Тинто АНУ-д төвтэй Аркадиум Литиумыг 6.7 тэрбум ам.долларын гэрээгээр худалдаж авахаар тохиролцсон нь түүнийг дэлхийн гурав дахь том лити олборлогчийн байр сууринд хүргэх стратегийн алхам болж, цахилгаан автомашины батерейны нийлүүлэлтийн сүлжээнд өөрийн оролцоог ихээхэн нэмэгдүүлсэн юм. Дэлхийн хамгийн том төмрийн хүдрийн үйлдвэрлэгч 2024 оны санхүүгийн жилд 660,000-720,000 тонн зэс олборлох төлөвтэй байсан бол 2025 оны санхүүгийн жилд 780,000-850,000 тонн болно гэж таамаглаж байна. Рио Тинтогийн Аргентин дахь Ринкон гарааны төсөл өнгөрсөн долоо хоногт анхны литийн үйлдвэрлэлээ амжилттай хэрэгжүүлсэн.
