-Гашуунсухайт-Ганцмод боомтын төмөр замын хилийн холболтын гэрээг олон улсын гэрээгээр зохицуулна-

Гашуунсухайт-Ганцмод боомтын төмөр замын хилийн холболтыг БНХАУ-ын төрийн өмчит “Чайна Энержи” компани хийхээр талууд урьдчилан тохироод байгаа. Энэ хүрээнд хэлэлцээр хийх ажлын хэсэг байгуулж, Аж үйлдвэр, эрдэс баялгийн сайд Ц.Туваан ахлан ажиллаж байгаа. Ажлын хэсгийн явцын талаар Аж үйлдвэр, эрдэс баялгийн сайд Ц.Туваантай ярилцлаа.

-“Чайна Энержи” компаниас Эрдэнэс Тавантолгойн Бортолгой, Ончхараат хоёр ордыг 16 жилээр олборлох саналыг манай талд тавьсан гэсэн. Үүнийг зөвшөөрөх боломжтой юу. Ер нь хил холболтын асуудлаар хэлэлцээр хийх ажлын хэсгийн явц ямар байна вэ. Хамгийн сүүлийн үеийн мэдээллийг өгөөч?

-Гашуунсухайт-Ганцмод боомтын төмөр замын хилийн холболтын ажлын хэсгийг би ахлах болоод удаагүй байна. Намайг ажил авснаас хойш шинэ, шинэ нөхцөл байдлууд үүсэж байгаа. Хятадын талын ажлын хэсэгтэй цахим хуралдаанаа хийгээд явж байна. Засгийн газраас УИХ дахь намын бүлгүүдэд “Чайна Энержи” компаниас ирүүлсэн албан бичгийг танилцуулсан.

Энэ хэлэлцээр “Гурвыг цогцоор” гэдэг гурван хэсгээс бүрдэх гэрээ байгаа юм. Үүнийг анх хоёр улсын Ерөнхийлөгчийн түвшинд тохиролцсон. Нэгд, төмөр замын хил холболтын асуудлыг шийднэ. Хил холбоно гэхээр хоёр төмөр замыг холбоно гэж ойлгоод байх шиг байгаа юм. Үнэндээ Монголын талаас өргөн царигийн төмөр зам яваад БНХАУ-ын нутаг руу орно. Хятадын талаас нарийн царигийн төмөр зам манай тал руу орж ирээд терминалууд дээрээ ачаагаа буулгаад явна. Төмөр замын хэлэлцээр гарын үсэг зурахад бэлэн болчихсон байгаа. Хоёрт, нүүрсний худалдах, худалдан авах асуудал. Энэ төмөр замаар нүүрсийг экспортод гаргах асуудлаар хоёр улсын дээд хэмжээний уулзалтын хүрээнд шийдсэн. Энэ асуудал эцэслэн шийдэгдээгүй байгаа. Гуравт, Эрдэнэс Тавантолгой компани одоо хамгийн дээд хүчин чадлаараа ажиллаж байгаа. Тэгэхээр бид нэмж нүүрс экспортод гаргая гэвэл шинэ ам нээж, олборлолт хийх ёстой. Тиймээс нээлттэй тендер зарлаж, олборлогч компани шалгаруулна. Энэ тендерт хэн орох нь нээлттэй байгаа.