Сангийн яамнаас өчигдөр орой УИХ дахь хоёр намын бүлэгт 2025 оны төсвийн хуулийн төслийн танилцуулгыг хийсэн. Тодруулбал, Сангийн сайд Б.Жавхлан МАН-ын бүлэгт, Сангийн яамны Төрийн нарийн бичгийн дарга Ж.Ганбат АН-ын бүлэгт  2025 оны төсвийн төслийн танилцуулгыг хийсэн юм.

Харин өнөөдөр 14.00 цагт Засгийн газар хуралдаж 2025 оны Төсвийн тухай хуулийн төслөө хэлэлцэн, УИХ-д өргөн мэдүүлэх аж. Ерөнхий сайд томилолттой байгаа учраас өнөөдрийн хуралдаанд цахимаар оролцох юм байна. 2025 оны төсвийн хуульд Ерөнхийлөгч бүхэлд нь хориг тавьсантай холбоотойгоор төсвийн зарлагыг 1.9-2.4 их наядаар бууруулах шаардлага үүссэн. МАН-ын бүлэг иргэдэд олгодог цалин, хүүхдийн мөнгийг хасахгүй байх улс төрийн шийдвэр гаргажээ. Тиймээс ирэх жил төрийн албан хаагчдын цалингийн зургаан хувийн нэмэгдэл болон хүүхдийн мөнгө тэтгэмжийг хэвээр олгохоор болсон байна.

Мөн Сангийн сайдын танилцуулсан төсөвт 833 тэрбумаар, гадаад зээлийн ашиглалтыг 211.6 тэрбумаар нийт 1.4 гаруй их наяд төгрөгөөр буулгахаар тооцжээ. Төсвийн тэнцлийн өөрчлөлтөөр тэнцвэржүүлсэн тэнцлийг 1.9 их наядаар, суурь тэнцлийг 1.7 их наядаар нэмэхээр болжээ. Харин төсвийн орлогыг 0.5 их наядаар, урсгал зардлыг 1.4 их наядаар, улсын төсвийн хөрөнгө оруулалтыг 0.8 их наядаар, гадаад зээлийг ашиглалтыг 0.2 их наядаар хасаар тооцжээ. Харин урсгал зардлаас 1.4 их наяд, хөрөнгийн зардлаас 0.8 их наяд, гадаад зээлийн ашиглалтд 0.2 их наяд гэх мэт нийт 2.4 их наядыг хасах саналыг намын бүлгүүдэд танилцуулсан байна. Өнөөдөр Засгийн газрын хуралдаанаар төсвийн төслөө эцэслэн хэлэлцээд УИХ-д өргөн мэдүүлэхээр болсон байна.