НИТХ өнөөдөр 10.00 цагт хуралдаж, нийслэлийн 2025 оны төсвийн төслийг хэлэлцэх байсан. Гэвч хуралдааны шууд дамжуулалт НИТХ-ын албан ёсны хуудсаар яваагүй бөгөөд хаалттай байдлаар нийслэлийн 2025 төсвийг баталсан байна.

Энэ асуудлыг НИТХ-ын хэвлэлийн албанаас тодруулахад "Хуваарийн дагуу хуралдаад, төсвөө баталсан нь үнэн” гэлээ.

2025 онд Нийслэл Улаанбаатар хот 3,807.6 тэрбум төгрөгийн орлого төвлөрүүлэхээр тооцсон байна. Нийт орлогын 87.8 хувь 3.3 их наяд төгрөгийг татварын орлогоос, үлдсэн 465 тэрбум төгрөгийг татварын бус орлогоос төвлөрүүлэхээр тус тус тооцжээ.

Хамгийн гол нь нийслэлийн төсөвтэй хамт Зам ашигласны төлбөр, Өөрөө явагч тээврийн хэрэгслийн албан татварын хэмжээг хувь нэмэгдүүлэх тогтоолуудыг өргөн мэдүүлсэн. Тэгэхээр нийслэлийн төсөв батлагдсанаар 2025 оны нэгдүгээр сарын 1-нээс өөрөө явагч тээврийн хэрэгслийн албан татвар 3 дахин, Зам ашигласны төлбөрийг 5 дахин нэмэхээр боллоо.