ТМК Энержи компани Монгол дахь хамгийн том төсөл болох Гурвантэс төслийнхөө хийн үйлдвэрлэлийн хүчин чадлыг хоёр дахин нэмэгдүүлж, төслийн хүрээнд өнгөрсөн амралтын өдрүүдэд гурван шинэ туршилтын цооног ашиглалтад оруулжээ.
TMK нь “Lucky Fox” зургаан туршилтын цооногтой бөгөөд Гурвантэсийн нүүрсний давхаргын хий төслийн хүрээнд арилжааны үйлдвэрлэлийн эрэл хайгуулаа хурдасгана гэж мэдэгджээ. Нийт 1.2 их наяд шоо фут нөөцтэй Гурвантэс XXXV ордыг Монголын хамгийн том хийн орд гэж үздэг.
TMK нь Гурвантэс XXXV төслийг 100 хувийг эзэмшдэг ба Баруун Австралийн Карнарвон орчмын Барроу-Дампиерийн дэд сав газарт байрлах Наполены төслийн 20 хувийг эзэмшдэг. TMK-ийн мэдээлснээр цооногийн үйлдвэрлэлийн хоолой, насос, температур мэдрэгч бүхий шилэн кабелийг LF-04, LF-05, LF-06 гэж нэрлэдэг гурван туршилтын цооногт амжилттай суурилуулсан байна.
TMK Энержигийн Гүйцэтгэх захирал Дугал Фергюсон "Туршилтын зургаан цооног ашиглалтад оруулснаар үйлдвэрлэлийн хүчин чадлыг хоёр дахин нэмэгдүүлж чадна. Ингэснээр цэвэр эрчим хүчний шийдлүүдийг дэмжин, Монголыг нүүрснээс ангижруулахад чухал хувь нэмэр оруулах боломжтой” гэжээ.
5.9 их наяд куб фут нөөцтэйг нь тогтоосон “Гурвантэс XXXV” төслийн талбай Монгол Улс болон БНХАУ-ын хилээс 20 км-ийн зайтай, 8400 км квадрат талбайг хамардаг бөгөөд 66 хувийг “TMK Energy”, 33 хувийг “Talon Energy” эзэмшдэг байсан. Харин 2024 оны хоёрдугаар сард Австралийн Хөрөнгийн биржид бүртгэлтэй “TMK Energy” компани “Гурвантэс XXXV” төслийн үлдсэн 33 хувийг “Talon Energy” компаниас худалдан авснаар төслийг 100 хувь эзэмшиж эхэлснээ зарласан билээ.
