Нийслэлийн ИТХ-ын ээлжит бус II хуралдаан болж 11 асуудал хэлэлцлээ. Хуралдаанаар агаарын бохирдлыг бууруулах чиглэлээр Нийслэлийн хэмжээнд авч хэрэгжүүлэх буй ажлын талаар мэдээлэл, Улаанбаатар хотод цэвэр эрчим хүчний эх үүсвэрийг нэвтрүүлж, хүлэмжийн хийг бууруулах талаар авах зарим арга хэмжээний тухай зэрэг асуудлуудыг хэлэлцлээ.

Агаарын бохирдлыг бууруулахын тулд нийслэлд хэд хэдэн төсөл хэрэгжүүлж байгаа аж. Тодруулбал, нэг төвт хотоос олон төвт хот болгон хөгжүүлэх бодлогын хүрээнд дэд зургаан төвүүдийг бий болгон, гэр хорооллын байршилд иргэдийг эрүүл, аюулгүй орчинд амьдрах нөхцөлийг бүрдүүлж, нийт 202.626 айлын орон сууцны төслийг хэрэгжүүлж байна. Дэд төвүүдийн бүтээн байгуулалтын хүрээнд 41.584 айлын орон сууц, дахин төлөвлөлтийн хүрээнд 148.323 айлын орон сууц, гадаадын зээл тусламжийн  хүрээнд 12.719 айлын орон сууцыг барьж байгуулахаар төлөвлөжээ.

Монгол Улсын Засгийн газрын 62 дугаар тогтоолын хэрэгжилт, агаарын бохирдлыг бууруулах чиглэлээр нийслэлийн хэмжээнд авч хэрэгжүүлж буй ажил, цаашдын бодлогын талаар Нийслэлийн Засаг даргын орлогч А.Амартүвшин танилцууллаа.

А.Амартүвшин: Шахмал түлш түлснээс хойш агаарын чанар нүдэнд харагдахуйц сайжраагүй. Цаашид нүүрс, технологио сайжруулаад амжилт олохгүй. Дахин төлөвлөлт, орон сууцжуулалт, сэргээгдэх эрчим хүч, гэсэн гаргалгаануудыг гаргаж байж утааны асуудлыг шийднэ. Сайруулсан шахмал түлш агаарын бохирдлыг байхгүй болгоогүй ч өөрийнхөө өгдөг өгөөжийг өгсөн. Улаанбаатар хотын агаарын бохирдлыг тодорхой хэмжээгээр бууруулсан.