Нийслэлийн Засаг даргын Тамгын газраас 2025 оны Нийслэл Улаанбаатар хотын төсвийн төслийг арваннэгдүгээр сарын 21-ий өдөр Нийслэлийн иргэдийн төлөөлөгчдийн хуралд өргөн барьсан. Хуулиараа нийслэлийн төсвийг арванхоёрдугаар сарын 5-ны дотор хэлэлцэх батлах ёстой.
2025 онд Нийслэл Улаанбаатар хот 3,807.6 тэрбум төгрөгийн орлого төвлөрүүлэхээр тооцсон байна. Нийт орлогын 87.8 хувь 3.3 их наяд төгрөгийг татварын орлогоос, үлдсэн 465 тэрбум төгрөгийг татварын бус орлогоос төвлөрүүлэхээр тус тус тооцсон байна.
Татварын орлогоос бүрдүүлэх хувь хэмжээ нэмэгдсэн шалтгаан нь 2025 оноос Авто тээврийн болон өөрөө явагч хэрэгслийн албан татварын хувь хэмжээг шинэчлэн батлах тухай, Авто зам ашигласны төлбөрийн хэмжээг шинэчлэн батлах тухай төслүүдийг Нийслэлийн төсвийн төсөлтэй хамт өргөн мэдүүлсэн байна. Дээрх татвар болон төлбөрийг 3-5 дахин нэмэгдүүлснээр нийслэлийн төсөвт 200 орчим тэрбум төгрөгийг бүрдүүлэх тооцоог хийжээ.
Өөрөөр хэлбэл, дээрх хуулиудыг шинэчилснээр 2025 оноос тээврийн хэрэгслийн албан татвар гурав дахин, зам ашигласны төлбөр тав дахин нэмэгдүүлнэ гэж тооцсон байна. Тодруулбал, иргэд хөдөлгүүрийн багтаамжаасаа хамаарч 36000-300000 төгрөгийг жил бүр бүр тээврийн хэрэгслийн албан татварт төлдөг. Тэгвэл 2025 оноос тээврийн хэрэгслийн албан татвар гурван дахин нэмэгдсэнээр 1500см3 хөдөлгүүрийн багтаамжтай Pruis машины албан татвар 36 мянгаас 108 мянга болох аж. Мөн авто зам ашигласны төлбөрийг 5 дахин нэмэгдүүлэх тухай холбогдох хуулийн төслүүдийг өргөн мэдүүлсэн байна.
Энгийн жишээгээр тайлбарлая. 3500 см3 хөдөлгүүрийн багтаамжтай автомашинтай иргэн өөрөө явагч тээврийн хэрэгслийн татварт жилд 114,048 төгрөгийн албан татвар төлж байсан бол ирэх жилээс албан татварын хэмжээ 3 дахин нэмэгдсэнээр 341250 төгрөг төлдөг болохоор төлөвлөж байгаа аж. Мөн 3500см3 хөдөлгүүрийн багтаамжтай тээврийн хэрэгсэл жилд 40 мянган төгрөгийг зам ашигласны төлбөрт төлдөг байсан бол энэ төлбөр 5 дахин нэмэгдэж 200,000 төгрөг болохоор байна.
Энэ талаар НИТХ-ын төлөөлөгч Т.Батцогт: Нийслэлийн төсвийн төсөлтэй хамт хоёр татварыг нэмэгдүүлэхээр оруулж ирсэн байна. Өнөөдөр мөрдөгдөж байгаа хуулиар Pruis автомашин жилд 36 мянган төгрөгийн тээврийн хэрэгслийн албан татвар төлдөг. Тэгвэл Нийслэлээс оруулж ирсэн төслөөр бол Pruis автомашины тээврийн хэрэгслийн албан татвар гурав дахин нэмэгдэж 108 мянган төгрөг болно гэсэн үг. Дээр нь Pruis машинтай иргэд зам ашигласны төлбөрт жилд 20 мянган төгрөг байсныг тав дахин нэмэгдүүлж 100 мянга болгохоор хуулийн өөрчлөлтүүд оруулж ирлээ гэж Eagle News-т тодруулга ярилцлага өгсөн байна.
2025 оны нийслэлийн төсвийг НИТХ удахгүй хэлэлцэнэ. Хотын дарга Х.Нямбаатар тээврийн хэрэгслийн албан татвар болон зам ашигласны төлбөрийг нэмэгдүүлэх замаар авто замын түгжрэлийг тодорхой хэмжээгээр бууруулна гэж тооцож буй бололтой. Гэхдээ 2024 оны УИХ-ын сонгуульд МАН татвар нэмэхгүй гэж амласан билээ.
