Өвөлжилтийн нөхцөл байдлын талаар Шадар сайд С.Амарсайхан мэдээлэл хийлээ.
Тэрээр "Хаваржилтын бэлтгэл ажлыг хангахтай холбоотой 21 аймгийн удирдлагуудтай цахимаар хуралдаж, тодорхой асуудлуудаар мэдээлэл солилцлоо.
Улсын хэмжээнд зудын эрсдэл өндөр байна
Өнөөдрийн байдлаар улсын хэмжээнд аймаг, орон нутгийн нөөц, тэр дундаа өвс тэжээл, худаг ус, хашаа саравч зэрэг өвлийг өнтэй давахтай холбоотой зайлшгүй, чухал асуудлын талаар гүйцэтгэлийн үнэлгээг хийлээ. Өнөөдрийн байлаар өвөлжилтийн бэлтгэл 87 хувьтай байна. Гэхдээ өвөлжилтийн бэлтгэл ажил өндөр хувьтай байгаа нь эрсдэлгүй гэсэн үг биш. Өвөлжилтийн бэлтгэл ажлын хувь өндөр байдаг ч зуд турхан, хур тунадас, цаг агаарын эрсдэлт нөхцөл байдлаас шалтгаалан өвлийн бэлтгэл ажлын нөөц хангалтгүй болох тохиолдол бий.
Улсын хэмжээнд зудын эрсдэлийн үнэлгээг хийхэд Баян-Өлгий, Увс, Ховд, Говь-Алтай, Завхан, Баянхонгор, Өмнөговь, Дорноговь аймгууд энэ жил гантай байсан учраас зудын эрсдэл өндөр байна. Ялангуяа Архангай, Баян-Өлгий, Говь-Алтай, Завхан, Сүхбаатар, Төв аймгийн хэмжээнд эрсдлийн түвшин маш их, улсын хэмжээнд зудын нөхцөл байдал их буюу дунджаас дээш байна.
Энэ жил өмнөх жилүүдтэй харьцуулахад хүйтний эрч өндөр, хур тунадас ахиу орох нөхцөл үүсэж байна. Тийм учраас аймаг, орон нутгуудад бэлэн байдлыг хангах, шинэ хоршоо хөдөлгөөний үйл ажиллагааг илүү үр дүнтэй болгох, цаашид авч хэрэгжүүлэх арга хэмжээний санал зөвлөмжийг гаргах, малчдад дэмжлэг үзүүлэх зудын нөхцөл байдал, болзошгүй нөхцөлийг газар дээр нь дүгнэж, тухай бүрд нь шаардлагатай арга хэмжээг авах үүднээс шуурхай бүлгүүдийг томилж 21 аймаг 330 суманд ажиллаж эхэлсэн. Өнөөдрөөс эхэлж УОК-ын дэргэдэх шуурхай штаб 24 цагийн бэлэн байдалд шилжиж, ажиллаж эхэлнэ" гэлээ.
