УИХ-ын Хууль зүйн байнгын хорооны өнөөдрийн хуралдаанаар Монгол Улсын 2025 оны төсвийн тухай хууль, хамт өргөн мэдүүлсэн болон холбогдуулан боловсруулж баталсан хууль тогтоомжид бүхэлд нь тавьсан Монгол Улсын Ерөнхийлөгчийн хоригийг хэлэлцэн хүлээн авах нь зүйтэй гэж үзлээ.

ЕТГ-ын дарга Г.Занданшатар гишүүдийн асуултад хариулсан юм. Тэрээр хэрвээ УИХ Ерөнхийлөгчийн тавьсан шаардлагыг биелүүлж төсвөө алдагдалгүй батлахгүй бол дахин хориг тавина гэдгийг хэллээ.

Тэрээр "Ерөнхийлөгчийн хоригийн нэгдүгээр зүйлд алдагдалгүй төсөв батлах нь зөв гэж тодорхой шаардлага тавьсан. 2018 онд УИХ алдагдалгүй төсөв баталж байсан түүх бий. Өнөөгийн энэ тодорхойгүй байдал төсвийн хуримтлалыг бий болгох, урсгал зардал болон валютын ханшинд нөлөөлж болзошгүй байгааг үзээд алдагдалгүй төсөв батлах ёстой гэж үзсэн.

Түүхий эдийн үнийг өсөлтийг дагаж төсөв тэлэхгүй, мөчлөг сөрсөн бодлого явуулж байхыг Төсвийн тогтвортой байдлын тухай хуульд заасан. Гэтэл энэ заалтыг хүчингүй болгож байгаад төсвийг хэт тэлсэн.

Аливаа хориг хууль тогтоох байгууллагын санамсаргүй болон санаатай алдааг засахад чиглэгддэг. Энэ хоригоор аймаг төсөв батлах процессыг хөнгөвчилсөн гэж хэлж болно. Хоригийг хүлээж авбал холбогдох байнгын хороо хууль санаачилж хэрэгжүүлж болдог.