УИХ-ын Төсвийн байнгын хорооны өнөөдрийн хуралдаанаар   Монгол Улсын 2025 оны төсвийн тухай хууль, хамт өргөн мэдүүлсэн болон холбогдуулан боловсруулж баталсан хууль тогтоомжид бүхэлд нь тавьсан Монгол Улсын Ерөнхийлөгчийн хоригийг хэлэлцлээ. Хэлэлцэж байгаа асуудалтай холбогдуулан гишүүд асуулт асууж, хариулт авч байна.

УИХ-ын гишүүн Н.Алтанхуяг: УИХ-ын олон гишүүн санал санаачилга гаргаад байхад худлаа молиго өмхүүлээд, хойноос нь УИХ-ын тогтоол гаргаж хууль зөрчиж батлагдаагүй төсөв батлах тогтоол гаргасан. Энэ бол УИХ-ын буруу биш хэдэн дарга нарын хийж байгаа ажил.

Одоо үүнийг зөв зүйтэй ашиглаад зөв юм хиймээр байна. Гэхдээ одоо УИХ нэг яланд унана шүү дээ. Би УИХ-ын ажлын хэсэгт ороод төсвөө янзалъя гээд явж байгаад  МАН-ын бүлэг хуралдаад л ямар ч өөрчлөлтгүйгээр баталсан. Одоо танай намын бүлэг төсвөө өөрчилье гэдэг хүсэл зориг байгаа юм байгаа биз дээ. Байхгүй бол наад төсөв чинь дахиад л бантан болно. Би одоо бол ажлын хэсэгт орохгүй. Дахиж тоглоомын хүүхэлдэй болохгүй.

Одоо Засгийн газрын оролцоотойгоор төсвөө янзлахгүй бол УИХ хэрэгт орно. Дараа нь УИХ хаа, гуяар нь салгачихсан гэнэ. Урсгал зардлыг  хангалттай танаж болохоор байгаа. Хууль зөрчөөд зөвхөн нийслэл дээр гэхэд 2000 орчим ухуулагч ажиллуулж байгаа шүү дээ. Хэсгийн ахлагч нэртэй. Тэдний цалинд 100 тэрбум төгрөг төсөвлөсөн.

УИХ-ын гишүүн Ц.Даваасүрэн: Ер нь хэтэрхий өссөн нь үнэн. Тиймээс Ерөнхийлөгчийн хоригоор алдагдлаа хасах нь зөв. Цаашдаа төсвөө алдагдалтай батлахгүй. Төсөв нэгэнт өсчихсөн хойно танах маш хэцүү. Б.Түвшинг би хасаад ороод ир гэхэд 306 тэрбумыг хасаж орж ирсэн. Гэтэл яагаад 3.6 их наядаар хас гэж мэдэгдэл хийснийг ойлгоогүй. Ажлын хэсэг дээр энэ нь 32 болж үлдээд чуулган дээр ороод хасагдаагүй. УИХ төсвөө хасаж чадахгүй байна шүү дээ. 28 тэрбумын эрхийн бичгийг ч хасаж чадахгүй байна.

3.6 тэрбум хас гээд байгааг би үзсэн. 1.4 нь цалин, тэтгэвэр тэтгэмж, цэргийн нэмэгдэл. Хүчний байгууллагынх 400 гаруй тэрбум төгрөг болчихсон. Энэ жилийн нэмэгдэл шүү. Мөн бүсийн хөгжлийг дэмжих зам, дэд бүтэц нь 1.4. Гурван тэрбум нь зөвхөн энэ хоёр. Цаана нь 600 л байгаа юм. Үүнд гурван хурал л байгаа юм. Би хувьдаа бүтцийн өөрчлөлт хийж хасахаас өөр аргагүй юм байна гэж харсан. Цалин 2020 оноос хойш 3 дахин нэмэгдэж 7 их наяд болсон байна. Энэ нь үрэлгэн орон тоонууд нэмэгдсэн гэсэн үг.