Ерөнхийлөгч У.Хүрэлсүх 2025 оны Төсвийн тухай хууль, хамт өргөн мэдүүлсэн болон холбогдуулан боловсруулж баталсан хууль тогтоомжид бүхэлд нь хориг тавьсан.

Одоо УИХ төсөвт тавьсан Ерөнхийлөгчийн хоригийг хүлээж авах, эсэхийг хэлэлцэн шийднэ. Одоогоор УИХ-ын хэлэлцэх асуудлын хуваарьт Ерөнхийлөгчийн хориг ороогүй байна. УИХ-ын Хууль эрх зүйн хэлтсээс хэлэлцэх асуудлын дарааллыг гаргадаг бөгөөд одоогийн байдлаар Ерөнхийлөгчийн хориг хуваарьт ороогүй байна.

Эхлээд УИХ-ын Хууль зүйн болон Төсвийн байнгын хороогоор Ерөнхийлөгчийн хоригийг хэлэлцэнэ. Гэхдээ байнгын хороод Хууль эрх зүйн хэлтэстээ хэлэлцэх асуудлын товоо оруулдаг байна. Тэгвэл хоёр байнгын хорооноос санал оруулаагүй байгаа аж. Ерөнхийлөгчийн хоригийг 10 хоногийн дотор хэлэлцэн тогтоол гаргах хуулийн хугацатай. УИХ-ын дэгийн тухай хуульд Ерөнхийлөгчийн хоригийг хэлэлцэхдээ,

90.1.Хууль, тогтоолд Монгол Улсын Ерөнхийлөгч хориг тавьсан бол Улсын Их Хурал хоригийг чуулганы үеэр ажлын 14 өдрийн дотор, чуулганы чөлөө цагт хориг тавьсан бол ээлжит болон ээлжит бус чуулган эхэлснээс хойш 10 хоногийн дотор хэлэлцэн шийдвэрлэж тогтоол батална.

90.2.Монгол Улсын Ерөнхийлөгчийн хоригийг тухайн асуудлыг анх хэлэлцэж санал, дүгнэлт гаргасан холбогдох Байнгын хороо болон Хууль зүйн байнгын хороо хэлэлцэж санал, дүгнэлт гаргана.

90.5.Гишүүд энэ хуулийн 90.4-т заасны дагуу үг хэлсний дараа Монгол Улсын Ерөнхийлөгчийн хоригийг хүлээн авах эсэх асуудлаар ил санал хураалт явуулах бөгөөд хэрэв хууль, тогтоолын зарим хэсэгт хориг тавьсан бол тухайн зүйл, хэсэг, заалт нэг бүрээр санал хураалт явуулж дүнг танилцуулах бөгөөд хоригийг шийдвэрлэсэн талаарх Улсын Их Хурлын тогтоол баталсанд тооцно.

90.6.Байнгын хорооны болон нэгдсэн хуралдаанд оролцсон гишүүдийн гуравны хоёр буюу 66.6 хувь нь Монгол Улсын Ерөнхийлөгчийн хоригийг хүлээж аваагүй бол хууль, тогтоол хүчин төгөлдөр үлдэнэ.

90.8.Монгол Улсын Ерөнхийлөгчийн хоригийг хүлээн авсан бол хууль, тогтоолыг бүхэлд нь буюу зарим хэсгийг нь хүчингүй болгох, шаардлагатай гэж үзвэл зохих нэмэлт, өөрчлөлт оруулах тухай хууль, тогтоолын төслийг хэлэлцэн баталж болно.

90.9.Монгол Улсын Ерөнхийлөгчийн хоригийг хүлээж авсантай холбогдуулан хууль, тогтоолд нэмэлт, өөрчлөлт оруулах бол тухайн шийдвэрийн төслийг холбогдох Байнгын хороо боловсруулж нэгдсэн хуралдаанд оруулах бөгөөд уг төслийн талаар Засгийн газар, холбогдох бусад байгууллагаас санал авахыг шаардахгүй" гэж заасан.

УИХ Ерөнхийлөгчийн хоригийг хүлээж авбал Засгийн газар 2025 оны төсвийг алдагдалгүй боловсруулсан төсөл бэлэн байгаа талаар Сангийн сайд Б.Жавхлан мэдээлсэн. Төсвийг алдагдалгүй болгон баталвал хөрөнгө оруулалт хийхээр төлөвлөсөн 1.7 их наядын 50 хувийг танахаар байгаа аж.