Монгол Улсын Ерөнхийлөгч У.Хүрэлсүх 2025 оны төсөв болон түүнийг дагалдуулж баталсан хууль, тогтоомжид бүхэлд нь хориг тавьснаа 11.00 цагт мэдэгдсэн. Ерөнхийлөгчийн зүгээс 2025 оны төсвийг алдалгүй батлах ёстойг сануулж, хориг тавьсан юм.
Ерөнхийлөгч 2025 оны төсөвт хориг тавьсантай холбоотойгоор Сангийн сайд Б.Жавхлан мэдээлэл өглөө.
Сангийн сайд Б.Жавхлан: Ерөнхийлөгчийн зүгээс алдагдалгүй төсөв батлах ёстой гэж үзэж байна. Энэ хүрээнд төсвийн хөрөнгө оруулалт, урсгал зардлаа танах шаардлагатай нүүр тулна. 2025 оны төсвийн нэмэгдэж байгаа зардлын 60-70 хувь нь хуулийн дагуу нэмэгдэж байгаа урсгал зардал эзэлж байна. Тухайлбал, цалин тэтгэвэр тэтгэмжийн үнийн өсөлттэй уялдуулсан өсөлт, хууль хүчний байгууллагуудын бие даасан хуулийн өөрчлөлтөөр орж ирж байгаа зардал, Боловсролын багц хуулийг дагасан зардал гэх мэт. Энэ зардлуудыг эргэн харах нөхцөл байдал үүснэ. Төсвийн хэлэлцүүлгийн үед яригдсан томилолтын зардал, Соёлын яамны ваучер зэрэг нь алдагдалгүй төсөв батлахад хэмжээний хувьд маш бага зардалд багтана. Тэгэхээр алдагдалгүй төсөв батлахад Засгийн газрын үйл ажиллагаа талдаа багагүй хэмжээний таналт хийх шаардлагатай гэсэн үг.
Нэгэнт алдагдалгүй төсөв баталъя гэдэг чиг хандлага гарч эхэлсэн учраас Засгийн газар бэлтгэлтэй байгаа. Тооцооллуудаа эхнээс нь хийж байна. Маргаашаас УИХ-аар Ерөнхийлөгчийн хоригийг хүлээж авах асуудал хэлэлцэгдэх байх. Хүлээж авна ч гэж харж байна. Тиймээс Засгийн газар Ерөнхийлөгчийн хоригийг эергээр хүлээн авч, нааштай өөрчлөлтүүдийг хийх тал дээр санаачилгатай ажиллана.
