Эко автомашин импортлогчдын холбоо ТББ, Авто худалдаа, машины бизнес эрхлэгчдийн холбоо ГҮТББ-аас шийдвэр гаргах эрх бүхий хүмүүст шаардлага хүргүүлж байгаа талаараа мэдээлэл хийж, доорх мэдэгдлийг гаргалаа. Мөн тус холбоодоос Нийслэлийн Засаг дарга Х.Нямбаатарыг ард иргэдийг ажил мэргэжлээр нь доромжилсон үгэндээ уучлалт гуйхыг шаардав.
Эко автомашин импортлогчдын холбоо ТББ-ын тэргүүн Ц.Лхагважав: Хууль, тогтоол, журмууд амьдрал дээр хэрэгжих боломжгүй байдалтай байна. Тухайлбал, нийслэлд автомашины дугаар олгохыг зогсоосноос хойш улсын бүртгэлийн системээр олгодог дугаар хар зах дээр үнэтэй болсон. Улсын дугаар хамгийн багадаа 2 сая төгрөгийн үнэтэй болоод байна. Хөдөө орон нутаг оршуулгын цэг юм уу гэсэн яриа хүртэл гараад байгаа. Автомашины бизнес эрхлэгчид түгжрэлийн эсрэг Засгийн газар, УИХ, Нийслэлийн Засаг даргын тамгын газраас авч хэрэгжүүлж байгаа бодлого, зорилтыг эсэргүүцээгүй. Харин дэмжиж байгаа. Гэхдээ хэрэгжүүлэх арга хууль, журам тогтоол нь амьдралд нийцэж байна уу гэдгийг эргэж хараач ээ. Иргэдийн өмчлөх эрхийг хязгаарласан шийдвэр болсон юм биш үү. Бид өнөөдрийг хүртэл холбогдох хүмүүст албан бичгээр хандаад, ярьж зөвшилцсөний үүднээс энэ асуудлыг шийдээч гэж хэлж байгаа. Жишээлбэл, түгжрэлийг бууруулахын тулд иргэдэд сонгох хэлбэрээр, эдийн засгийн аргаар, шилжилтийн хугацаатай аргаар шийдэж болно. Ингэхгүйгээр гэнэтийн шийдвэр гаргах нь иргэд болон бизнес эрхлэгчдэд төрийн үйлчилгээний болон үнийн дарамтыг бий болгож байна. Бид эвтэй найртайгаар асуудлыг хэлэлцэж шийдэх байр суурьтай байсан ч НИТХ-ын хуралдааны индэр Хотын дарга Х.Нямбаатар маш ноцтой мэдэгдэл хийсэн. Өөрөөр хэлбэл, автомашины бизнес эрхэлж байгаа хүмүүсийг маш бүдүүлгээр гүтгэж, гутаан доромжилсон. Энэ салбарт ажиллаж байгаа хүмүүс хотын даргын мэдэгдэлд маш их эмзэглэж байна. Сонгууль дууслаа, маргааш нь та нар "май шүү" гэдэг шиг үгийг Хотын дарга хэлж болж байгаа юм уу. Эцэг хүн хүүхдүүдээ луйварчин, хулгайч, сайн гэж ялгадаггүй байх. Үүнтэй адилхан хотын дарга хотын иргэдийнхээ нийтлэг эрх ашгийг хангахын төлөө ажиллах ёстой байх. Бид Монголд хуулиар хүлээн зөвшөөрөгдсөн бизнес хийж байгаа. Бид машин гаднаас оруулж ирж байгаа нь хотын даргын түгжрэлийг бууруулах бодлогыг эсэргүүцэж байгаа юм шиг хандлагыг Х.Нямбаатар дарга өгөөд байгаа нь буруу. Түгжрэлийн асуудал үүссэн нь бизнес эрхэлж байгаа бид, худалдан авч байгаа иргэдийн буруу биш шүү дээ. Өнгөрсөн 30 жилийн төлөвлөлтгүй газар олголт, авлигын үр дагавар. Бид нэр төрөө сэргээлгэхээр Ерөнхий сайдад хандаж, хууль шүүхийн байгууллагаар явна.
Авто худалдаа, машины бизнес эрхлэгчдийн холбооны тэргүүн П.Ганцоож: Хотын дарга Х.Нямбаатар болчимгүй мэдэгдэл гаргасандаа уучлал гуй. Дараа нь түгжрэлийн эсрэг мэргэжлийн холбоо, иргэдийн төлөөллүүдийг оролцуулаад захирамжаа хэлэлцье гэлээ.
Улаанбаатар хотын түгжрэл, агаарын бохирдол, зам тээврийн ослын тоог бууруулах зорилгоор Улаанбаатар хотод олгох улсын бүртгэлийн дугаарын дээд хязгаарыг 730 мянгаар тогтоох шийдвэр 11-р сарын 8-наас хэрэгжиж эхэлсэн билээ. Энэхүү шийдвэрийн хүрээнд импортоор орж ирж буй автомашинд Улаанбаатар хотын серитэй улсын дугаар олгоход хязгаарлалт хийсэн. Энэхүү шийдвэр нь Монгол Улсын иргэн өмчтэй байх Үндсэн хуулиар олгогдсон эрхийг хязгаарласан байсан тул хэсэг иргэний төлөөлөл Үндсэн хуулийн цэцэд хандсан. Үүнээс үүдэн уг шийдвэрийг зөв, буруу хэмээн олон нийтийн дунд томоохон хэлэлцүүлэг үүсээд байна.
Энэ үйл явдалтай холбогдуулан Нийслэлийн Засаг дарга бөгөөд Улаанбаатар хотын захирагч Х.Нямбаатар НИТХ-ын анхдугаар чуулганд мэдээлэл өгөхдөө бизнес эрхлэгчдийг ёс бусаар хэлж, гүтгэсэнд гомдолтой байгаа юм.
Юуны өмнө, бид түгжрэлийг шийдэхийг дэмжиж байгаагаа илэрхийлье. Харин Х.Нямбаатарыг суудлаас нь огцруулъя гэж акц зохион байгуулаагүй бөгөөд албан ёсны шаардлагуудыг холбогдох албан байгууллагад өгч, шийдүүлэхийг оролдож байсан болно. Тиймээс Нямбаатарыг ард иргэдээ ажил мэргэжил, нийгмийн байдлаар нь ялгаварлан гадуурхаж, доромжилсон тус үйлдэлдээ уучлал гуйхыг шаардаж байна. Цаашлаад ажил хэргийн нэр хүндэд учирсан хохирлоо нөхөн төлүүлэхээр шүүхэд хандах болохоо үүгээр мэдэгдье.
Энэхүү хэвлэлийн хурлаар бид шийдвэр гаргах эрх бүхий хүмүүст 3 шаардлага тавьж байна.
Импортоор орж ирж буй автомашинд улсын дугаар олгох журмыг дахин боловсруулж, бизнес эрхлэгчдийн нөхцөл байдлыг тусгах. Тодруулбал, аливаа хууль, журмыг боловсруулахдаа эрх нь ашиг нь хөндөгдөж буй бизнесийн байгууллагыг хамгийн бага хохиролтой байлгахаар тусгах ёстой юм.
Ачигдаад ирж буй 37 мянга гаруй машинд улсын дугаар олгох. Улаанбаатар хотод бүртгэх авто машины дээд хэмжээг 730 мянга байхаар баталсан ч одоогийн байдлаар 800 мянга даваад байна.
Улсын бүртгэлийн дугаар авахад тавьж буй шаардлагын заримыг нь хасах. Тодруулбал, машиндаа улсын дугаар авахын тулд хувьдаа зогсоолтой, гарааштай байх ёстой гэж журамд тусгасан нь Монгол Улсын иргэнд Үндсэн хуулиар олгогдсон өмчтэй байх эрхийг зөрчиж байна. Мө 2015 оноос хойш үйлдвэрлэгдсэн, эко, 0 километртэй гэж шаардлага тавьсан нь 100-150 сая төгрөгтэй хүн л машин унаж, бусад нь алх гэснээс өөрцгүй юм.
Хэрэв эдгээр шаардлагыг биелүүлэхгүй бол бид тэмцлийн дараагийн шатанд шилжиж, суулт зарлах болно.
Эко автомашин импортлогчдын холбоо ТББ
Авто худалдаа, машины бизнес эрхлэгчдийн холбоо ГҮТББ
