УИХ дахь АН-ын бүлэг ээлжит хуралдаанаа хийж, хуралдаанаар хэлэлцсэн асуудлын талаар мэдээлэл хийлээ. Хэвлэлийн хуралд бүлгийн дарга, УИХ-ын гишүүн О.Цогтгэрэл, УИХ-ын гишүүн Б.Жаргалан, Ч.Лодойсамбуу нар оролцлоо. Өнөөдрийн хуралдаанаар "Гашуунсухайт-Ганцмод" боомтын төмөр замын хилийн холболтын бүтээн байгуулалтын явцын талаар, Улаанбаатар хотын агаарын бохирдлын эсрэг авч хэрэгжүүлж байгаа арга хэмжээ, бүлгийн гурав дахь дэд даргаар Ч.Лодойсамбуу гишүүнийг сонгох, Анхдугаар үндсэн хууль баталсан 100 жилийн арга хэмжээ гээд таван асуудал хэлэлцжээ. УИХ дахь АН-ын бүлгийн дарга О.Цогтгэрэл: "Гашуунсухайт-Ганцмод" боомтын асуудал өнгөрсөн 10 гаруй жил улс төрийн халуун сэдэв байж ирсэн. Монгол Улс уул уурхайгаас өндөр хамааралтай орон болсон. Нүүрс нь "Гашуунсухайт-Ганцмод" боомтын хил холболтын асуудал маш чухал болсон. Дөрвөн жилийн өмнө тухайн үеийн эрх баригчид утааг ялчихлаа гэж байсан. Гэтэл өнөөдөр утаа гамшгийн байдалд байгаа. Нийслэлээс V цахилгаан станц барьж байгуулахаар ажиллана гэж байна. Наймдугаар сард баталсан Засгийн газрын үйл ажиллагааны хөтөлбөрт V цахилгаан станц барина гэсэн үг, өгүүлбэр байгаагүй. Тэгэхээр нийслэл Засгийн газраасаа тусаа V цахилгаан станц барих гээд байна уу. Эрх зүй, хөрөнгө санхүүгийн хувьд боломжтой юу. Эрчим хүчний яам нь оролцдоггүй эрчим хүчний том байгууламж байгуулах боломжтой юу гэдэг асуулт гарч ирж байна.
