УИХ-ын нэгдсэн чуулганаар Цөмийн энергийн тухай хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төслүүдийн анхны хэлэлцүүлгийг хийж байна. Хэлэлцэж байгаа асуудалтай холбогдуулан гишүүд асуулт асууж, хариулт авч байна.

УИХ-ын гишүүн Ж.Ганбаатар: Шар нунтгаас НӨАТ авах боломжгүй. Эцсийн бүтээгдэхүүн гэдгээр чөлөөлөгдөж байгаа. Гэхдээ Монгол Улс бүх татвараа авах ёстой. Хуульд нь өөрчлөлт оруулах ёстой. Мөн Цөмийн энергийн тухай хуульд орон нутагтай харилцах харилцаа гэж байхгүй. Үүнийг зохицуулахгүй бол Ховдод болоод байгаа асуудал дахиад үүснэ.

Ажлын хэсгийн ахлагч Б.Пүрэвдорж: НӨАТ-ыг авах ёстой гэсэн байр суурьтай байгаа. Шар нунтгийг эцсийн бүтээгдэхүүн гэж үзэх үү, үгүй юү гэдэг дээр гол асуудал байгаа юм. Гэтэл Засгийн газрын тогтоолоор шар нунтгийг эцсийн бүтээгдэхүүний ангилалд оруулсан. Засгийн газар шар нунтгаас НӨАТ авах, үгүйгээ шийдэж оруулж ирээгүй гэсэн үг.

Сангийн сайд Б.Жавхлан: Орлого бүрдүүлэлт талаасаа НӨАТ авмаар байна. Гэтэл 20210 оны Засгийн газрын хуралдаанаар шар нунтгийг эцсийн бүтээгдэхүүн гээд тодорхойлчихсон юм билээ. Тиймээс үүнийг өөрчлөх үү, хэвээр үлдээх үү гэдгээ нэг тийш нь болгох ёстой.

УИХ-ын гишүүн П.Сайнзориг: АМНАТ-ын орлогын ихэнх хувийг орон нутагт нь үлдээх асуудлыг ойрын хугацаанд шийдмээр байна. Тэгж байж уул уурхайн төслүүд явна. Газрын ховор, уран ч юм уу төсөл хэрэгжүүлэгч нь олон нийтийн компани болгомоор байна.

АМНАТ-ыг нэлээд боломжийн авахаар хуулийн төсөлд оруулж ирсэн. Хамгийн өндөр АМНАТ авч байгаа улс Узбек найман хувийг авдаг. Манайх хэдэн хувийн АМНАТ авахаар байгаа вэ?

Аж үйлдвэр эрдэс баялгийн сайд Ц.Туваан: Компаниас ААНОАТ, бүтээгдэхүүнээс авч байгаа АМНАТ-ын хуваарилалтын асуудал байгаа. Уул уурхай ашиглуулж байгаа аймаг орон нутгийн иргэдэд ирэх өгөөж байх ёстой.

Ажлын хэсгийн ахлагч Б.Пүрэвдорж: АМНАТ дунджаар 5.5 хувь байдаг. Хамгийн их ураны нөөцтэй Казахстан зургаа, Канад тав, Нигер тав, Австрали тав, Узбек найман хувийн АМНАТ авч байна.

Ажлын хэсгийн гишүүн геологич Г.Жамсрандорж: Цацраг байгаа хүдэр дээрээ өндөр болохоос 2-3 метр холдоход цацраг байхгүй болдог. Тиймээс ажиллаж байгаа хүмүүс болон орчин тойронд нь байгаа хүмүүст очих нөлөөлөл эрс багасдаг. Монгол Улсад урантай цэгүүд хэдэн зуугаараа хаа сайгүй байдаг.

УИХ-ын чуулганы хуралдаан үргэлжилж байна.