УИХ-ын нэр бүхий гишүүд 2025 оны төсвийн төслийг эсэргүүцэн гарын үсэг цуглуулж байгаа.
Тодруулбал, өнгөрсөн даваа гаригт УИХ-ын гишүүн Г.Тэмүүлэн, Д.Энхтүвшин, Ж.Баярмаа, Б.Түвшин нар 2025 оны төсвийн зардлыг 3.6 их наядаар бууруулахыг шаардаж, хэвлэлийн хурал хийн, гарын үсэг цуглуулж хэлээд байгаа. Гэхдээ энэ нь төсвийн хоёрдугаар хэлэлцүүлэг хийж дууссан үе бөгөөд одоо өөрчлөлт оруулах хуулийн боломж байхгүй. Энэ талаар УИХ-ын гишүүн Г.Дамдинням хэлэхдээ "Одоо бол төсвийн гуравдугаар хэлэлцүүлэг рүү орчихсон. Хоёрдугаар хэлэлцүүлэг өнгөрөөд ямар ч өөрчлөлт оруулах хуулийн боломжгүй. Бид арваннэгдүгээр сарын 15-нд төсвөө батлах ёстой. Хуулийн хугацаандаа баталж амжихгүй бол УИХ тарна.
Одоо хуулийн хувьд хоёр гарц байна. Нэгд, Засгийн газар хуулийн хугацаандаа багтаад төсвөө батлаад өг, төсвийн тодотгол оруулж ирж, илүү байгаа зардлаа хасъя гэдгээ мэдэгдээд төсвөө янзлах. Энэ бол УИХ, Засгийн газар хоёрын хоорондын асуудал.
Хоёрт, Монгол Улсын Ерөнхийлөгч хориг тавих. Ерөнхийлөгч бүхлээр нь хориг тавивал. УИХ-аас ажлын хэсэг гаргаад шүүмжлэгдэж байгаа асуудлыг цэгцлэх, урсгал зардлыг бууруулах ажлаа хийж болно.
Хуулийн гарцгүй зүйл рүү чиглүүлээд ямар ч үр дүн гарахгүй. Хүссэн хүсээгүй бидэнд үлдэж байгаа гарц нь л энэ" гэлээ.
