УИХ-ын гишүүн Д.Энхтүвшин 2025 оны төсвийн зардлыг бууруулахыг шаардаж мэдээлэл хийсэн. Тэрээр хэвлэлийн хурлын үеэр "Засгийн газарт итгэл алдарч байна, намын бүлгийн анхны хуралдаанд эсрэг байр суурь илэрхийлсний дараа надад тодорхой хэмжээний дарамт ирсэн" гэж мэдэгдсэн. Харин сэтгүүлч хэн таныг дарамталсан бэ гэхэд "Та нар сонсоогүй юу, Н.Учрал гишүүн" гэж хэлсэн.

Тэгвэл үүнийх нь араас удалгүй ЗГХЭГ-ын дарга Н.Учрал нийгмийн сүлжээнд байр сууриа илэрхийлсэн.

ЗГХЭГ-ын дарга Н.Учрал "ЗГ-ын үйл ажиллагааны хөтөлбөр боловсруулах үеэр МҮХАҮТанхимыг урьж ажиллуулж саналуудыг нь тусгасан байтал санал аваагүй гээд байхаар нь Д.Энхтүвшин гишүүнээс асуусан асуулт маань дарамталж байгаа мэт санагдсан бололтой. Төсвийн үеэр Д.Энхтүвшин гишүүнийг би дарамтлах байтугай нэг үг ч солиогүй. Чуулган, байнгын хороогоор ч бид хоёрт зөрчилдсөн зүйл огт үгүй. Цаашид харин чуулган, байнгын хорооны хуралдаанд Д.Энхтүвшин гишүүнээс асуулт асууж болохгүй юм байна. Их эмзэг хүн бололтой. Би ер нь хүн бүртэй найрсаг сайхан харилцаж нөхөрлөж явдаг гэдгийг бүгд мэднэ дээ" гэжээ.

Үүнийх нь хариуд УИХ-ын гишүүн Д.Энхтүвшин өнөөдөр нийгмийн сүлжээнд дэх хаягаараа дахин мэдэгдэл хийжээ. Тэрээр Н.Учрал гишүүнийг дарамталсан гэдгээ дахин давтаж, " Үгэнд чинь орсонгүй гэж намайг намаас хөөж, намын бүлэг дээр арга хэмжээ авахуулах хүсэлтэй байгаа сурагтай байсан. Би МАН-ын гишүүн биш, намын бүлгээс хөөвөл хөөгдье" гэж мэтээр хатуухан байр суурь илэрхийлжээ.