УИХ-ын чуулганаар 2025 оны төсвийн төслийг хэлэлцэж байгаа. Ирэх оны төсвийн зарлага 2023 оныхтой харьцуулахад 60 хувиар нэмэгдсэнийг УИХ-ын гишүүн Д.Энхтүвшин эсэргүүцэж байгаа бөгөөд өнөөдөр энэ талаар мэдээлэл хийх юм байна.

Хамтарсан Засгийн газар байгуулсан гурван нам гурвуулаа дөрвөн сарын өмнө УИХ-ын ээлжит сонгуульд оролцохдоо төсвийн зарлагыг бууруулна гэж мөрийн хөтөлбөртөө тусгасан. Харин Хамтарсан Засгийн газар анхны төсвөө өргөн барихдаа төсвийн зарлагыг их хэмжээгээр нэмэгдүүлж орж ирсэн.

УИХ-ын гишүүн Д.Энхтүвшин өөрийн цахим хуудастаа:

"МАН: Улсын төсвийн зарлагын ДНБ-д эзлэх хувийг 25 хувь хүртэл болгож бууруулна.

АН: Монгол улсын нэгдсэн төсвийн зардлыг 20 хувиар танана.

ХҮН: Төсвийн зардлыг бодитоор бууруулах бодлого баримтална гэж сонгуулиар дөрөвхөн сарын өмнө амласан.Гэтэл 2025 оны төсвийг 2023 онтой харьцуулахад 60 хувь нэмэгдүүлж, ДНБ-ий 37.7 хувь болгож нэмэгдүүлэх төсвийн төсөл оруулж ирсэн. Нэмэгдүүлсэн төсвийг дэмжихгүй, данхар төсвөө танахыг шаардаж байна.МАН 68, АН 42, ХҮН 8 гишүүдийг хэлсэн ярьснаасаа буцахгүй байхыг уриалж байна. Сонгогчид та бүхэн ч бас төсвийн зардлыг нэмэгдүүлэх юм улстөрчдөөс гуйхгүй байхыг уриалж байна" гэжээ.

Засгийн газар ирэх жилээс 14 мега төсөл хэрэгжүүлж эхлэхээ зарлаад байгаа. Үүнийг дагаж төсвийн зарлага нэмэгдэж байгаа хэмээн тайлбарлаад байгаа юм. Харин төсвийн зарлага их хэмжээгээр нэмэгдэж байгааг зарим гишүүн эсэргүүцэж байгаа юм.