Казахстан, Монгол хоёр улсын худалдааны эргэлт 2024 оны наймдугаар сарын байдлаар 83.9 сая ам.долларт хүрсэн тухай Казахстаны Ерөнхийлөгч Касым-Жомарт Токаевын Монгол Улсад хийх төрийн айлчлалын өмнөхөн Казахстаны Худалдаа, интеграцийн яамнаас иш татан “Казинформ” мэдээлжээ.
Философи, улс төр, шашин судлалын хүрээлэнгийн Улс төр судлалын төвийн захирал Айдар Амребаевын Монгол, Казах орнууд Хятад, Орос зэрэг томоохон гүрнүүдтэй харилцахдаа гадаад бодлогын ижил төстэй байр суурьтай байдаг гэдгийг онцолжээ.
Улс орнууд боловсрол, шинжлэх ухаан, мэдээлэл, археологи, нүүдэлчдийн түүхийн чиглэлээр хоёр талын санаачилгыг дэмжиж, соёлын харилцаагаа хөгжүүлэх зорилгоор хамтарсан музей нээхээр төлөвлөж байгаа аж.
“Манай улсуудын хооронд түүх, соёлын хэлхээ холбоо бий. Одоо бид Казахстанд Зүчи [Монголын эзэн Чингис хааны ууган хүү хаан]-тай холбоотой бүтээн байгуулалт хийж байна. Монголын үндэсний, соёлын өвөрмөц байдал ч Чингис хааны өв уламжлалд тулгуурладаг” гэдгийг Амребаев тодотгожээ.
Казахстан, Монгол улсууд Казахстаны Оскемен, Риддер, ОХУ-ын Туйекта хотыг дайран Монголын хил рүү нэвтрэх шинэ автозам тавихаар хэлэлцэж байгаа аж. Оскеменээс Оросын хил хүртэлх замыг Казахстан аль хэдийн бариад байгаа аж.
Амребаев хэлснээр Транс-Каспий олон улсын тээврийн зам нь Монгол Улс тээврийн коридороо төрөлжүүлэх, Казахстанаар дамжин Европын холбоонд хүрэх ирээдүйтэй гарц болохыг онцоллоо. Токаевын Монголд хийх айлчлал олон талт, үр дүнтэй санаачилга авчирна гэдгийг ч тодотгожээ.
Бүгд Найрамдах Казахстан Улсын Ерөнхийлөгч Касым-Жомарт Токаевын Монгол Улсад хийж буй айлчлалын угтах ёслол өнөөдөр болох бөгөөд Ерөнхийлөгч нар нар албан ёсны хэлэлцээ хийж, хэвлэл хамтарсан мэдэгдэл хийх аж.
Айлчлалын үеэр хоёр улсын харилцааны эрх зүйн үндсийг бэхжүүлж, тээвэр, логистик, хөдөө аж ахуй, мал эмнэлэг, мэдээллийн технологи, соёл, аялал жуулчлал зэрэг салбарын хамтын ажиллагааг өргөжүүлэн хөгжүүлэхэд чиглэсэн Засгийн газар болон байгууллага хоорондын баримт бичгүүдэд холбогдох албан тушаалтнууд гарын үсэг зурна.
Ерөнхийлөгч К.Токаевын энэ удаагийн төрийн айлчлал нь Бүгд Найрамдах Казахстан Улсын төрийн тэргүүний түвшинд 2008 онд хийсэн айлчлалаас хойш 16 жилийн дараа болж байна.
