Аймаг, нийслэл, сум, дүүргийн Иргэдийн төлөөлөгчдийн хурлын 2024 оны ээлжит сонгуулийн санал хураалт өндөрлөж, дүнгүүд урьдчилсан байдлаар гарлаа. Сонгуулийн дүнтэй холбоотойгоор МАН-ын Ерөнхий нарийн бичгийн дарга Я.Содбаатар болон Нийслэлийн МАН-ын дарга Х.Нямбаатар нар мэдээлэл хийлээ.

МАН-ын Ерөнхий нарийн бичгийн дарга Я.Содбаатар: Энэ удаагийн орон нутгийн сонгуульд нийт сонгогчдын 53 хувь оролцож саналаа өгсөн байна. МАН-ын хувьд 2020 оны орон нутгийн сонгуулиар 21 аймгийн 13-т ялж, найман аймагт ялагдаж байсан бол нийслэлд найман дүүрэгт ялалт байгуулж байсан. Харин энэ удаагийн орон нутгийн сонгуулийн урьдчилсан дүнгээр 21 аймгийн 14-т ялалт байгууллаа. Харин НИТХ-ын 45 мандатаас 40 суудал авч МАН ялалт байгууллаа. Нийслэлийн есөн дүүргээс найман дүүрэгт ялалт байгуулж байна. УИХ-ын сонгуулийн дүнгээ баталгаажуулж дахин МАН-д итгэл хүлээлгэж саналаа өгсөн нийт ард иргэддээ талархал илэрхийлье.

Нийслэлийн МАН-ын дарга Х.Нямбаатар: НИТХ-ын 45 мандатаас 40 мандатад МАН-аас нэр дэвшигчид ялалт байгуулсан байна. Энэ удаа нийслэлийн МАН есөн эмэгтэйг нэр дэвшүүлсэн. Есүүлээ ялалт байгуулсан гэсэн сайхан мэдээтэй байна. 2024-2028 онд нийслэлийн МАН-аас дэвшүүлсэн мөрийн хөтөлбөрийг бид хэрэгжүүлж, Улаанбаатар хотын тулгамдсан олон асуудлыг шийдэж, их бүтээн байгуулалт их хөгжлийн тэсрэлтийг хийх болно.