20.00 цаг болж улсын хэмжээнд аймаг, орон нутаг, сум, дүүргийн ИТХ-ын санал хураалт өндөрлөсөн. Аймгууд Сонгуулийн хороод дээрээ дэлгэц байрлуулаад дүнгүүдээ дамжуулж бол нийслэлийн дүнг СЕХ дээрээс шууд дамжууллаа. 21.00 цагийн байдлаар Нийслэлийн бүх тойргийн дүнг нэгтгэж дуусч, урьдчилсан дүнг танилцууллаа.

Нийслэлийн есөн дүүргийг 12 тойрогт хуваасан бөгөөд нийт 45 төлөөлөгч сонгогдоно. Урьдчилсан дүнгээр нийслэлийн 45 төлөөлөгчийн 40 нь МАН-аас, 5 нь АН-аас сонгогджээ. Ингэснээр НИТХ-д МАН олонх болж, ялалт байгуулав.

Гэхдээ энэ удаагийн орон нутгийн сонгуулиар нийслэл хамгийн бага буюу 42.3 хувийн ирцтэйгээр санал хураалт өндөрлөсөн юм. Хуулиараа аймаг сум, дүүргийн ИТХ-ын сонгууль ирцийн босгогүй учраас нэмэлт санал хураалт явуулахгүй. Ингээд дүүрэг бүрээр хамгийн олон санал авсан нэр дэвшигчийг танилцуулъя.

• Баянзүрх дүүрэг- 3 тойрог 9 мандаттай. Урьдчилсан дүнгээр МАН-аас нэр дэвшигч Г.Ууганбаяр, Ч.Батзориг, А.Баяр, Б.Мөнхбаатар, Э.Одонтуяа, Г.Жаргалсайхан, Ү.Оюунзул, Т.Даваадалай, Д.Жавхлан, АН-аас нэр дэвшигч Т.Батцогт нар олонхийн санал авчээ.

• Чингэлтэй дүүрэг- дөрвөн мандаттай. МАН-аас нэр дэвшигч Н.Мандуул, Б.Мөнхбат, Л.Ариунтуяа, З.Төмөртөөмөө нар олонхийн санал авчээ.
• Сүхбаатар дүүрэг-дөрвөн мяндаттай. АН-аас нэр дэвшигч Д.Бадарсан, Х.Эрдэнэсүх, МАН-аас нэр дэвшигч Х.Эрдэнэсүрэн Б.Ану-Үжин, Б.Дөлгөөн нар хамгийн олон санал авчээ.
• Хан-Уул дүүрэг- Зургаан мандаттай. МАН-аас нэр дэвшигч А.Амартүвшин, Ж.Энхжаргалан, Т.Хосбаяр, Г.Батсайхан, Б.Мягмар, АН-аас нэр дэвшигч О.Зундуйдорж олонхийн санал авчээ.
• Сонгинохайрхан дүүрэг- хоёр тойрог, 10 мандттай. МАН-аас нэр дэвшигч Ц.Төрхүү, Г.Батзориг, Ц.Баттөр, Э.Хулан, Б.Сэргэлэнбаатар, Х.Нямбаатар, Д.Ундармаа, Ж.Сундагсүрэн, Б.Хуягбаатар, Г.Батбаяр МАН-аас нэр дэюшигчид олонхийн санал авчээ.  
• Багануур дүүрэг- хоёр мандаттай. МАН-аас нэр дэвшсэн С.Даваасүрэн, Т.Отгонболд нар олонхийн санал авчээ.
• Багахангай дүүрэг нэг мандаттай- АН-аас нэр дэвшигч Б.Золтуяа олонхийн санал авчээ.
• Баянгол дүүрэг 6 мандаттай- МАН-аас нэр дэвшсэн Ө.Сумъябатар, Ж.Батбаясгалан, Д.Ихэрбаяр, Б.Сэмжидмаа, Ч.Мэндбаяр, Э.Энхтөр
• Налайх дүүрэг хоёр мандаттай бөгөөд одоогоор дүн нэгтгэгдэж ирээгүй байна.