УИХ-ын гишүүн Х.Болормаа цаг үеийн асуудлаар мэдээлэл хийлээ.Орон нутгийн сонгуульд нэр дэвшгчид, сөрөг хүчний удирдлагууд дүүргийн төсвийн талаар ташаа мэдээлэл өгч байгаад харамсаж байна. 2024 оны дүүргийн төсөв 564 тэрбум төгрөг. Энэ мөнгийг Сүхбаатар дүүрэг дангаараа зарцуулсан мэтээр мэдээлэл тархаж байна. 564 тэрбум төгрөгийн төсвийн 71.3 хувь нь, бүр тодруулбал 402.2 тэрбумыг нь Улаанбаатар хотод төвлөрүүлсэн. Тэгэхээр жил жилийн орон нутгийн төсвийн 70-72 хувийг Улаанбаатар хотод төвлөрүүлдэг. Цаана үлдэж буй 30 хүрэхгүй хувийг нь урсгал зардалд хэрэглэдэг.Сүхбаатар дүүрэг улсын хэмжээнд анх удаа орон нутгийн төсвөөр Нэгдсэн эмнэлэг барих ажлыг 2018 онд эхлүүсэн. Ингээд өчигдрөөс /2024.10.07/ эмнэлгийн үйл ажиллагаа албан ёсоор эхэлсэн. Сүхбаатар дүүргийн нэгдсэн эмнэлэг хувьчлагдаад 10 гаруй жил болж байна. Өөрөөр хэлбэл одоо байгаа эмнэлэг менежментийн хувьчлалд орсон. Ингээд бид 2018 онд нийслэлд төвлөрүүлэх орлогоо 25 тэрбумаар давуулсан бөгөөд давсан орлогоороо 2018 онд нийслэлд томоохон бүтээн байгуулалт хийхээр шийдвэрлэсэн нь Сэлбэ нэгдсэн эмнэлэг. Сэлбэ нэгдсэн эмнэлэг нь дүүргийн иргэдэд үндсэн 7 чиглэлээр эрүүл мэндийн үйлчилгээг үзүүлэх бөгөөд хэвтэн эмчлүүлэх 200 ортой. Мөн хоёр блок бүхий 100 автомашины зогсоол, ногоон байгууламж, амрах талбай бүхий иж бүрэн тохижилттой. Нийт хэвтэн эмчлүүлэх 200 ортой ба үүнээс хүүхдийн тусламж үйлчилгээнд 40 ор байхаас 4 ор нь хүүхдийн эрчимт эмчилгээний, насанд хүрэгчдийн 160 орноос 6 ор нь хүлээн авах яаралтай тусламжийн ашиглалт тусгаарлах, 20 ор нь насанд хүрэгчдийн эрчимт эмчилгээний ор байхаар төлөвлөгдсөн. Эмнэлгийн тусламж үйлчилгээ үзүүлэхэд зайлшгүй шаардлагатай 184 нэр төрлийн 2672 ширхэг тоног төхөөрөмж, компьютер техник хэрэгсэл, эм эмнэлгийн багаж хэрэгслийг дүүргийн төсвөөр авч бэлэн байдлыг хангасан.
